Կալանքը խափանմա՞ն, թե՞ պատժի միջոց

«Մաքուր Երկաթ» գործարանի տնօրեն Կարեն Հակոբյանը 2024 թվականի սեպտեմբերի 20-ից Հակակոռուպցիոն դատարանի դատավոր Սարգիս Դադոյանի որոշմամբ գտնվում է անազատության մեջ. խափանման միջոց է ընտրվել 2-ամսյա կալանքը:

Կարեն Հակոբյանի փաստաբանական թիմը բողոք է ներկայացրել վերաքննիչ դատարան` բողոքարկելով կիրառված խափանման միջոցի վերաբերյալ որոշումը:

Այսօր Yerkir.am-ը Քննչական կոմիտեից հետաքրքվեց, թե արդյոք ի՞նչ խափանման միջոցներ են կիրառվել այս գործով անցնող այլ մեղադրյալների նկատմամբ։ ՀՀ քննչական կոմիտեի նախագահի մամուլի քարտուղար Գոռ Աբրահամյանը հրաժարվեց տեղեկություն տրամադրել` նախաքննական տվյալների հրապարակման ենթակա չլինելու հիմքով կամ պատճառաբանությամբ։

Yerkir.am-ը կապ հաստատեց նաև սույն գործով մեկ այլ մեղադրյալ Ավետիք Հովիկյանի փաստաբան Մարգար Սողոմոնյանի հետ, ով ասաց, որ իր պաշտպանյալի նկատմամբ խափանման միջոց է կիրառվել գրավը և տնային կալանքը:

Հարց է առաջանում` ինչո՞վ է պայմանավորված նույն գործի շրջանակում երկու մեղադրյալի նկատմամբ տարբեր խափանման միջոցների ընտրությունը և ի՞նչ արդյունք կարող է դա ապահովել 2019 թվականին փակված ու այժմ անհասկանալի դրդապաճառներով նորից վերաբացված գործի քննության համար: