կարևոր
2347 դիտում, 1 ամիս առաջ - 2024-06-12 18:00
Հասարակություն

Ճակատագրական օրերին փորձում են ինձ կրկին զրկել ազատությունից. Գերասիմ Վարդանյանի հայտարարությունը

Ճակատագրական օրերին փորձում են ինձ կրկին զրկել ազատությունից. Գերասիմ Վարդանյանի հայտարարությունը

ՀՅԴ Հայաստանի ԳՄ անդամ Գերասիմ Վարդանյանը հայտարարություն է տարածել, որը ներկայացնում եքն ստորև․

«Սիրելի հայրենակիցներ, այսօր իշխանական որոշ լրատվամիջոցներ ինձ վերագրվող ինչ-որ ձայնագրություն են հրապարակել, որի նպատակը պարզ է մեզ համար՝ ինձ վարկաբեկել ու ինչ-որ մտացածին հիմքեր ստեղծել ինձ կալանավորելու համար:

Սա իմ նկատմամբ տևական ժամանակ տեղի ունեցող քաղաքական հետապնդումների հերթական արարն է: 

Հասկանալի ու ինձ համար սպասելի է այս գործելաոճը. ինչպես անցած անգամ ինձ շուրջ 7  ամիս կալանավորելով փորձեցին մեկուսացնել ինձ մեր երկրում տեղի ունեցող քաղաքական- ժողովրդական ընդվզումից, «Դիմադրություն» շարժմանն իմ մասնակցությունն ունենալու իրավունքից, նույնը կատարում են հիմա՝ մեր պետության համար այս ճակատագրական օրերին փորձելով ինձ զրկել իմ ժողովրդի արժանապատվության համար մղվող պայքարի մասնակիցը լինելու իրավունքից: 

Ես բանտի դարպասների դիմաց եմ ասել, որ թքած ունեմ իրենց կողմից տրված թե՛  ազատության, թե՛ անազատության վրա, ինձ համար կարևորը մեր հայրենիքի ազատությունն է: Հիմա ևս հաստատում եմ:

Եթե մեր հայրենիքի ազատությանը հասնելու ճանապարհը անցնում է բանտերով՝ ես ևս մեկ անգամ պատրաստ եմ անցնել դրանով:

Իմ կյանքն ու ազատությունը պատկանում են իմ երկրին ու հայ ժողովրդին:

Հ.Գ. Ընկերներիս ու ինձ հետ պայքարող հայրենակիցներիս կոչ եմ անում շարունակել Սրբազան պայքարը մինչև վերջ, և եթե հիմա սրանք որոշել են շինծու մեղադրանքով ինձ նորից բանտախուց վերադարձնել, ես ձեզ հետ կպայքարեմ այնտեղից»: