Դիարբեքիրի պատմական ասորական եկեղեցում Սուրբծննդյան պատարագ է մատուցվել

Դիարբեքիրի Սուր շրջանում գտնվող Սուրբ Մարիամ Աստվածածին պատմական ասորական եկեղեցում Սուրբծննդյան պատարագ է մատուցվել։ Պատարագի ժամանակ հոգևոր երգերը ներկայացրել են ասորերեն և թուրքերեն լեզուներով։

Այդ մասին, Akunq.net-ի փոխանցմամբ, հաղորդում է թուրքական «Անադոլու» պետական լրատվական գործակալությունը։ Աղբյուրի համաձայն՝ հավատացյլաներին նշխար է բաժանվել։ Ասորիները մոմեր են վառել և երազանքներ պահել։ Պատարագից հետո ներկաներին չյորեք (կուլիչ, որը քրիստոնյաները պատրաստվում են Սուրբ Հարության և Սուրբ Ծննդյան տոներին-Ակունքի խմբ․) են հյուրասիրել։

Եկեղեցու քահանա Սալիբա Աչիշը «Անադոլու» գործակալության թղթակցի հետո զրույցում իր ուրախությունն է հայտնել Սուրբ Ծննդյան պատարագի կապակցությամբ։ Նա ափսոսանքով նշել է, որ տեղի ասորական համայնքից պատարագին ընդամենը 20 հոգի է մասնակցել և հավելել, որ այնուամենայնիվ իրենց մենակ չեն թողել Դիարբեքիրի մուսուլմանները, որոնք ևս ներկա են եղել արարողությանը։

Թե՛ հոգևորականը և թե՛ «Անադոլու»-ին հարցազրույց տված մի ասորի հավատացյալ Նոր տարում խաղաղություն են մաղթել աշխարհին՝ հատկապես նկատի ունենալով Պաղեստինում շարունակվող պատերազմը։

https://www.aa.com.tr/tr/yasam/diyarbakirdaki-tarihi-meryem-ana-kilisesinde-noel-ayini-yapildi/3091979

Թարգմանեց Մելինե Անումյանը

Akunq.net