Արցախից Հայաստան գաղթի ճանապարհին մահվան դեպքեր են գրանցվել

Արցախից Հայաստան գաղթելու ճանապարհին մահվան դեպքեր են գրանցվել։ Գորիսում տեղի ունեցած ճեպազրույցում այս մասին հայտնել է ՀՀ առողջապահության նախարար Անահիտ Ավանեսյանը։

«Մարդիկ 40 ժամից ավելի ճանապարհին են եղել, և այդ ընթացքում գրանցվել են մահեր՝ ինսուլտից, մեծահասակ մարդկանց մահ։ 10 ամիս լինել շրջափակման մեջ, հիմնականում թերսնված, երկար ժամանակ խրոնիկ հիվանդությունների համար դեղորայք չունենալով, դրա համար իրենց համար շատ կարևոր է հենց առաջին կետում նրանց առաջին բուժօգնության տրամադրումը»,- նշել է նա:

Ինչ վերաբերում է Ասկերան-Ստեփանակերտ ճանապարհին վառելիքի պահեստում տեղի ունեցած պայթյունից տուժած մեր հայրենակիցներին՝ Ավանեսյանը նշել է, որ ընդհանուր առմամբ 140-ից ավելի պացիենտներ տեղափոխվել էին ԲԿ-ներ միայն այրվածքներով.

«Պայթյունից տուժածների առումով հիմնական ծանր ընթացքը դեռ շարունակվում է։ Ունենք ծայրահեղ ծանր վիճակում պացիենտներ, և բժիշկները պայքարում են նրանց կյանքի համար»: