Հայաստանում ԵՄ առաքելությունը չպետք է խաթարի կարգավորման գործընթացը. Ադրբեջանի ԱԳՆ

Հայաստանում ԵՄ առաքելության գործունեությունը չպետք է օգտագործվի Ադրբեջանի և Հայաստանի միջև հարաբերությունների կարգավորման գործընթացը, ներառյալ սահմանների սահմանազատման գործընթացը խաթարելու համար, ասվում է Ադրբեջանի ԱԳՆ պաշտոնական հայտարարության մեջ` դեպի Հայաստան քաղաքացիական առաքելություն ուղարկելու ԵՄ որոշման վերաբերյալ։

ԵՄ առաքելության տեղակայումը Հայաստանում պետք է պատշաճ կերպով ապահովվի՝ հաշվի առնելով Ադրբեջանի օրինական շահերը, և իրականացվի այնպես, որ չխաթարի փոխադարձ վստահությունը։

Ադրբեջանը հուսով է, որ ԵՄ առաքելության տեղակայման ժամանակ կցուցաբերվի առավելագույն զգուշավորություն, և հաշվի կառնվի անցյալի փորձը, քանի որ առաջին երկամսյա դիտորդական առաքելության գործունեությունն ուղեկցվել է Պրահայում ձեռք բերված պայմանավորվածությունների հետ լուրջ հակասություններով։

ԵՄ առաքելության ներկայությունը չարաշահելը վտանգավոր է գոյություն ունեցող երկխոսության մեխանիզմների համար և պետք է խուսափել դրանից. ասվում է Ադրբեջանի ԱԳՆ հայտարարության մեջ։

Նշենք, որ առաքելության մանդատը երկու տարի է։ Նրա ղեկավարը կնշանակվի մոտ ժամանակներս։