Ադրբեջանի՝ ԼՂ-ի նկատմամբ հավակնություններից չհրաժարվելը կշարունակի բարդացնել խաղաղ կարգավորման գործընթացը

ԱՄՆ ազգային հետախուզության տնօրեն Ջեյմս Քլեփերը զեկույց է ներկայացրել 2016 թվականին Լեռնային Ղարաբաղի հակամարտության սրման հավանականության մասին:

Համաշխարհային սպառնալիքների վերաբերյալ  ԱՄՆ Սենատի զինված ուժերի հարցերով հանձնաժողովին ներկայացված ամենամյա զեկույցում մասնավորապես նշվել է. «Հայաստանի և Ադրբեջանի միջև Լեռնային Ղարաբաղի խնդրի շուրջ լարվածությունը շարունակել է բարձր մնալ 2015 թվականին։ Բաքվի կողմից կայուն ռազմական ներուժի կուտակումը, Ադրբեջանում տնտեսական վատթարացող պայմանների հետ մեկտեղ, մեծացնում է 2016 թվականին հակամարտության պոտենցիալ սրման հավանականությունը։ Ադրբեջանի՝ Լեռնային Ղարաբաղի նկատմամբ հավակնություններից հրապարակայնորեն հրաժարվելու և Հայաստանի՝ իր վերահսկողության տակ գտնվող տարածքներից հրաժարվելու բացակայությունը խաղաղ կարգավորման գործընթացը շարունակելու է բարդացնել»: