«Փակում ենք ամբողջ փողոցը». ցուցարարները, այդ թվում՝ պատգամավորները, Կորյունի փողոցում նստեցին գետնին

Հաղթանակի զբոսայգուց դեպի Աբովյան պուրակ տանող ճանապարհին անհնազանդության երթի ժամանակ «Հայաստան» խմբակցության պատգամավոր, ԱԺ փոխխոսնակ Իշխան Սաղաթելյանը հայտարարեց, որ մի ուղղությամբ չեն բավարարվում եւ ամբողջ փողոցն են փակում:

Այդպես քայլելով՝ երթը հասավ Կորյունի փողոց, որտեղ Իշխան Սաղաթելյանը հայտարարեց՝ նստում ենք՝ հանգստանալու։ Ցուցարարները նստեցին գետնին՝ փակելով փողոցը։ Այդ ընթացքում նրանք վանկարկում էին՝ «Նիկոլ դավաճան»։

Նշենք, որ այսօր՝ ժամը 12-ին, Երեւանում չորս ուղղությամբ անհնազանդության երթեր և ակցիաներ են մեկնարկել: Առաջին երթը մեկնարկել է Գայի պողոտայից՝ «Մեգամոլ» առևտրի կենտրոնի մոտից, երկրորդը Րաֆֆու փողոցից՝ Անդրանիկի արձանի մոտից, երրորդը՝ 15 թաղամասից՝ Չաուշի արձանի մոտից, և չորրորդը՝ Սասունցի Դավթի արձանի մոտից։

Ժամը 19.00-ին Ֆրանսիայի հրապարակում տեղի կունենա ամփոփիչ հանրահավաք։

Մայիսի 2-ից խաղաղ անհնազանդության ակցիաներ են սկսվել Երեւանում, ամեն օր փակվում են մի շարք փողոցներ: Մայիսի 2-ից Երևանի Ֆրանսիայի հրապարակում հանրահավաքներ են իրականացվում։