Թուրք-հունական սահմանին ներգաղթյալների հետ կապված միջադեպ է տեղի ունեցել

Շաբաթ երեկոյան միջադեպ է տեղի ունեցել թուրք-հունական սահմանին, երբ անօրինական ներգաղթյալների խումբը նավակով հատելիս է եղել Էվրոս գետը: Ինչպես հայտնում է հունական Sky հեռուստաալիքը, թուրքական կողմից արձակված կրակոցից կին է մահացել:

Աղբյուրի տվյալներով՝ հրաձգությունը տեղի է ունեցել տեղի ժամանակով 21:00-ից հետ Սուֆլի շրջանի մոտակայքում: Թուրքական կողմից արձակված կրակոցներից կին է մահացել: Հույն սահմանապահները ներգաղթյալների նավակը հայտնաբերել են երկու երկիրը բաջանող գետի թուրքական ափին, որտեղից նրանք պատրաստվում էին անցնել Հունաստան:

Սահմանապահները պնդում են, որ պատասխանել են թուրքական կողմից հնչած կրակոցներին, ինչը տեղի էր ունեցել այն բանից հետո, երբ իրենք նախազգուշացրել էին ներգաղթյալներին, որ նրանց նավը չմոտենա հունական ափին:  

Հունական առափնյա պահակախումբը լուսային ազդանշաններով նախազգուշացրել է, որ ներգաղթյալների նավը փոխի ընթացքը, սակայն նրանք այդպես չեն արել: Դրանից հետո թուրքական կողմից կրակոցներ են սկսվել, ինչին հույները համապատասխան արձագանք են տվել, ընդգծել է հեռուստաալիքը: Արդյունքում հունական իշխանությունները հայտնաբերել են 6 ներգաթյալի եւ մահացած կնոջը:

Հունական ERT-1 հեռուստաալիքն, իր հերթին, տեղեկացրել է, որ 22-ամյա կինն աֆրիկյան ծագում է ունեցել: Ենթադրվում է, որ փոխադրողի եւ ներգաղթյալների միջև վիճաբանություն է ծագել, ինչի հետեւանքով 22-ամյա կինը մահացու վիրավորում է ստացել 22 մմ կալիբրի ատրճանակից: Նման ատրճանակներ չեն օգտագործում ո՛չ հույն, ո՛չ թուրք սահմանապահները: Ափ հասնել հաջողվել է վեց ներգաղթյալի, ինչպես նաեւ մի երեխայի: Եվս հինգ մարդ այդ խմբից մնացել է թուրքական ափին: