Ուկրաինան հնարավոր է համարում Ղրիմը «փակագծերից հանելը»՝ հանուն Ռուսաստանի հետ խաղաղության պայմանագրի

Ուկրաինան կարող է գնալ օկուպացված Ղրիմի հարցը «փակագծերից դուրս» դնելուն՝ հանուն Ռուսաստանի հետ իրական խաղաղության պայմանագրի ստորագրման։ Սակայն տարածքային ամբողջականության հարցերը կորոշի բացառապես նախագահ Վլադիմիր Զելենսկին։ Այս մասին РБК-Украина-ին տված հարցազրույցում ասել է նախագահի աշխատակազմի ղեկավարի խորհրդական Միխայիլ Պոդոլյակը։

«Տարածքային ամբողջականության հետ կապված ամեն ինչ որոշում է բացառապես Ուկրաինայի նախագահը։ Նա բազմիցս արտահայտել է իր դիրքորոշումը՝ Ղրիմը Ուկրաինայի անբաժան մասն է։ Ուկրաինայի բոլոր տարածքներն Ուկրաինա են»,- պատասխանել է նա այն հարցին, թե պատրա՞ստ են թերակղզու հարցը «փակագծից դուրս» դնել, եթե այն դառնա անհաղթահարելի խոչընդոտ խաղաղության պայմանագրի ստորագրման համար։

Պոդոլյակի խոսքով՝ որոշ հարցեր կարելի է դնել առանձին բանակցային դիրքերում։