ԱՄՆ-ը որոշել է Ուկրաինայում դեսպանատունը տեղափոխել Լվով և կոչ է արել այրել դեսպանատան համակարգիչները

ԱՄՆ պետքարտուղար Էնթոնի Բլինքենը հայտարարել է Ուկրաինայում դեսպանատունը Կիևից Լվով տեղափոխելու մասին: Պետքարտուղարը դեսպանատան տեղափոխությունը ժամանակավոր է անվանել։

Ավելի վաղ Ուկրաինայի նախագահը սխալ էր համարել օտարերկրյա դիվանագիտական ներկայացուցչությունների տեղափոխումը երկրի արևմուտք:

«Մենք Ուկրաինայում դեսպանատան գործունեությունը Կիևում դեսպանատնից Լվով ժամանակավոր տեղափոխելու գործընթացում ենք՝ ռուսական ուժերի զգալի կուտակման պատճառով»,- ասվում է Պետդեպարտամենտի հայտարարության մեջ:

Բլինքենն ընդգծել է, որ նման որոշում է կայացվել դիվանագիտական առաքելության «աշխատակիցների անվտանգության համար»։

Բացի դրանից, ըստ լրատվամիջոցների, դեսպանատանը հրահանգվել է այրել այնտեղ գտնվող բոլոր համակարգիչները:

Հիշեցնենք, որ երեկ լրատվամիջոցները հայտնել էին նաև Կիևից Կանադայի դեսպանատան տեղափոխման մասին: