Թուրքմենստանում մեկնարկում է նախընտրական քարոզարշավը

Փետրվարի 14-ին Թուրքմենստանում մեկնարկել է նախագահական ընտրությունների նախընտրական քարոզարշավը, որի առաջին փուլում կառաջադրվեն թեկնածուները. հայտնում է «ՌԻԱ Նովոստին»։

Երկրի ընտրական օրենսգրքի համաձայն՝ թեկնածուներ առաջադրելու իրավունքը պատկանում է քաղաքական կուսակցություններին և քաղաքացիների խմբերին։ Վերջին դեպքում անհրաժեշտ է հավաքել ընտրողների առնվազն տասը հազար ստորագրություն։

Թուրքմենստանում կա երեք քաղաքական կուսակցություն՝ Դեմոկրատական կուսակցությունը, Ագրարային կուսակցությունը և Թուրքմենստանի արդյունաբերողների և գործարարների կուսակցությունը։

Նշվում է, որ պետության ղեկավար կարող է ընտրվել առնվազն քառասուն տարեկան՝ Թուրքմենստանի քաղաքացի, որը ծնվել է երկրում և մշտապես բնակվել ու աշխատել է այնտեղ վերջին 15 տարիներին։ Նա ընտրվում է 7 տարով։

Ավելի վաղ Թուրքմենստանի գործող նախագահ Գուրբանգուլի Բերդիմուհամեդովը հայտարարել էր, որ ցանկանում է երիտասարդ առաջնորդներին զիջել պետական կառավարումը։ Կենտրոնական ընտրական հանձնաժողովը արտահերթ ընտրություններ է նշանակել մարտի 12-ին։