Ռուսաստանում ձերբակալվել են թուրք լրագրողներ՝ ծայրահեղականության մեղադրանքով

GZT թուրքական հրատարակության խմբագիրներ Նազգյուլ Քենժեթայը և Էմին Քարաչաքը ձերբակալվել են Ռուսաստանում նկարահանումների ժամանակ։ Ըստ «Անադոլու» գործակալության՝ Քենժեթայը և Քարաչաքը վավերագրական ֆիլմ են նկարահանել Ռուսաստանում թյուրքական համայնքների կյանքի մասին և ձերբակալվել են Խակասիայի Հանրապետությունում ծայրահեղականության դեմ պայքարի բաժնի կողմից՝ հյուրանոցի դիմաց, որտեղ հանգրվանել էին։ 

Դեպքը տեղի է ունեցել դեկտեմբերի 16-ին, առգրավվել են լրագրողների իրերը, ոչնչացվել նկարահանված բոլոր նյութերը, իսկ նրանց՝ ձերբակալվածներին, լրտեսության մեղադրանք է առաջադրվել։ Թուրք լրագրողներին տեղափոխել են Խակասիայի մայրաքաղաք Աբականի ժամանակավոր կալանավայր՝ հետագա արտաքսման համար, և տեղավորել առանձին խցերում։ Լրագրողներին ասել են, որ 10 օր կալանքից հետո իրենց կարտաքսեն։ Սակայն Քենժեթայը և Քարաչաքը հայտնում են, որ իշխանությունները ձգձգում են գործընթացը՝ իրենց կալանքը երկարացնելու համար։ Ավելի վաղ նրանք ձերբակալվել էին Յակուտիայում և Ալթայում, սակայն տուգանքները վճարելուց հետո ազատ էին արձակվել։ Քարաչաքը նշել է, որ Ռուսաստանի Դաշնության մյուս շրջաններում դժվարությունների չեն հանդիպել, սակայն թյուրքական հանրապետություն մտնելուց հետո մշտապես ենթարկվել են Ռուսաստանի իրավապահ մարմինների ճնշումներին։