Ուկրաինայի արևելքում ռուսաստանցի լրագրողներ են ձերբակալվել

Ուկրաինայի «Ազգային գվարդիայի» զինծառայողները երկրի հարավ-արևելքում ձերբակալել են ռուսական «Զվեզդա» հեռուստաընկերության օպերատոր Անդրեյ Սուշենկովին և վիդեոինժեներ Անտոն Մալիշևին: BBC-ն հայտնում է, որ դեպքը տեղի է ունեցել Սլավյանսկից ոչ հեռու գտնվող հսկիչ-անցումային կետում:

Լրագրողները Ուկրաինա էին գնացել` լուսաբանելու նախագահ Պյոտր Պորոշենկոյի երդման արարողությունը:

Լրագրողներին կասկածում են անցակետում ծառայության կազմակերպման վերաբերյալ «դիտարկումներ անելու և տեղեկատվություն հավաքելու» մեջ: Ըստ «Ազգային գվարդիայի»` լրագրողներն ունեցել են ինքնահռչակ «Դոնեցկի Ժողովրդական Հանրապետության» կողմից հավատարմագրված լինելը հաստատող փաստաթղթեր:

Համաձայն РИА Новости-ի` ձերբակալված լրագրողներին հանձնել են Ուկրաինայի անվտանգության ծառայությանը` անցումային կետի մոտակայքում գտնվելու նպատակն ու հանգամանքները պարզելու համար:

Ռուսաստանի արտաքին գործերի նախարարությունը խիստ մտահոգություն է հայտնել ձերբակալության կապակցությամբ:

Հիշեցնենք, որ Ուկրաինայի հարավ-արևելքում իշխանությունները լայնամասշտաբ գործողություն են կատարում ռուսամետ աշխարհազորայինների դեմ: