Արևմուտքը ԱՊՀ երկրների նկատմամբ ապակառուցողական միջոցներ է ձեռնարկում. ՌԴ հետախուզական ծառայություն

Արևմուտքը համակարգված ու նպատակային միջոցներ է ձեռնարկում, որոնց նպատակը ԱՊՀ երկրների վրա ապակառուցողական ազդեցություն գործադրելն է, նրանց ապակայունացնելը: ՏԱՍՍ-ը, վկայակոչելով Ռուսաստանի արտաքին հետախուզության ծառայության մամուլի բյուրոն, հայտնում է, որ այս կարծիքին են համագործակցության երկրների հատուկ ծառայությունների ղեկավարները:

Ըստ Ռուսաստանի արտաքին հետախուզության ծառայության՝ հարցը քննարկվել է չորեքշաբթի՝ հոկտեմբերի 13-ին, Մոսկվայում ԱՊՀ անդամ պետությունների անվտանգության և հետախուզական ծառայությունների ղեկավարների հերթական հանդիպման ընթացքում:

Քննարկվել է հատուկ ծառայությունների փոխգործակցությունն ԱՊՀ տարածքում անվտանգության և կայունության ապահովման գործում՝ «Համագործակցության պետությունների վրա կոլեկտիվ Արևմուտքի կործանարար ազդեցության և դրսից ուժով «ժողովրդավարություն»  պարտադրելու փորձերի համատեքստում»: «Հատուկ ստորաբաժանումների ղեկավարները եկել են միակարծիք համոզման, որ այդ գործընթացներն ուղղված են ԱՊՀ երկրներում ներքաղաքական իրավիճակի ապակայունացմանը, համակարգված են և նպատակային», - նշվում է հայտարարության մեջ: