Եգիպտոսը նշել է, որ Թուրքիայի հետ հարաբերություններում առաջընթաց կա

Եգիպտոսի արտաքին գործերի նախարար Սամեհ Շուքրին հայտարարել է, որ Եգիպտոսի և Թուրքիայի հարաբերություններում առաջընթաց է նկատվում:

«Հարաբերությունների կարգավորման հարցը դեռ չի հասել հաջորդ մակարդակին, սակայն կա որոշակի առաջընթաց, որը, հուսով ենք, կզարգացնենք»,- Շուքրիի խոսքերն է մեջբերում Hurriyet-ը:

Անկարան և Կահիրեն վերջերս միմյանց նկատմամբ քայլեր են ձեռնարկել՝ փորձելով վերականգնել հարաբերությունները ավելի քան յոթ տարվա քաղաքական օտարումից հետո:

Շուքրին նշել է, որ հետագա առաջընթացը կախված կլինի այն բանից, թե որքանով երկու երկրները կպահպանեն «երկկողմ հարաբերությունները կարգավորող կանոնները, յուրաքանչյուր կողմի պարտավորությունները՝ չմիջամտել մյուս կողմի ներքին գործերին, հարգել և ճանաչել պետական ինքնիշխանության սկզբունքը»:

«Մենք դուռ կբացենք Թուրքիայի հետ մեր հարաբերությունների հետագա առաջընթացի համար, երբ գոհ լինենք մեր միջև վիճելի հարցերի լուծումներից»,- ասել է նա:

Հիշեցնենք, որ սեպտեմբերի 8-ին երկու երկրների դիվանագետներն Անկարայում անցկացրեցին նախնական բանակցությունների երկրորդ փուլը`Թուրքիայի և Եգիպտոսի միջև հարաբերությունների կարգավորման ջանքերի շրջանակներում: Այնուհետև Թուրքիայի ԱԳՆ-ն ասաց, որ երկու կողմերն էլ «համաձայնել են շարունակել այս խորհրդակցությունները՝ վերահաստատելով քննարկված ոլորտներում առաջընթաց գրանցելու՝ իրենց ցանկությունը և իրենց հարաբերությունների կարգավորմանը նպաստող հետագա քայլերի անհրաժեշտությունը»:

Եգիպտոսի հրավերով մայիսին Կահիրեում տեղի էր ունեցել նախնական բանակցությունների առաջին փուլը: Համատեղ հայտարարության մեջ կողմերը բանակցությունները որակել են որպես «անկեղծ և մանրակրկիտ»: