ՌԴ-ն նշել է` երբ կսկսվեն Հայաստանի և Ադրբեջանի միջև սահմանազատման աշխատանքները, նաև հայտնել է Երևանի և Անկարայի միջև հարաբերություններում միջնորդ լինելու պատրաստակամության մասին

Շուտով կարող է ստեղծվել Հայաստանի և Ադրբեջանի միջև պետական սահմանի սահմանազատման հանձնաժողով. «ՌԻԱ Նովոստի»-ին տված հարցազրույցում ասել է ՌԴ փոխարտգործնախարար Անդրեյ Ռուդենկոն։

«Մենք ենթադրում ենք, որ դա տեղի կունենա շուտով։ Մենք անհաղթահարելի խոչընդոտներ չենք տեսնում այս համաձայնագրի՝ ամենաբարձր մակարդակով իրագործման ճանապարհին»,- ասել է նա։

ՌԴ փոխարտգործնախարարը նշել է, որ մայիսին հայ-ադրբեջանական սահմանի առանձին հատվածներում իրավիճակի սրման հենց սկզբից Ռուսաստանը հանդես է եկել որպես միջնորդ՝ առաջարկելով իր աջակցությունը Հայաստանի և Ադրբեջանի միջև համապատասխան բանակցային գործընթաց սկսելու համար։

Ռուդենկոն նշել է, որ «...խնդիրը ժառանգվել է խորհրդային ժամանակներից և պայմանավորված է երկու երկրների միջև պետական սահմանի ողջ երկայնքով միջազգային իրավական գրանցման բացակայությամբ»։

Անդրադառնալով հայ-թուրքական հարաբերությունների կարգավորման գործընթացին՝ Ռուդենկոն ասել է, որ Մոսկվան պատրաստ է միջնորդական օգնություն ցուցաբերել ցանկացած ձևով: «Միևնույն ժամանակ, մենք կարևոր ենք համարում հրաժարվել նախնական պայմանների առաջադրումից, կենտրոնանալ փոխադարձ ընդունելի թեմաների և փոխադարձ քայլերի վրա, որոնք կհանգեցնեն վստահության մթնոլորտի աստիճանական ձևավորմանը և բարիդրացիության»,- ասել է նա։