ԱՄՆ-ը դադարեցնում է դիվանագիտական ներկայությունը Աֆղանստանում. Բլինքեն

ԱՄՆ-ն օգոստոսի 31-ին դադարեցնելու է իր դիվանագիտական ներկայությունը Աֆղանստանի մայրաքաղաք Քաբուլում: Այս մասին հայտարարել է ԱՄՆ պետքարտուղար Էնթոնի Բլինքենը:

Նրա խոսքով՝ Դոհայում ԱՄՆ հյուպատոսության միջոցով կիրականացվի Աֆղանստանի հետ կապված դիվանագիտական գործունեությունը։

Բլինքենը հայտնել է, որ Միացյալ Նահանգները մինչ օրս Աֆղանստանից տարհանել է մոտ 123 հազար մարդու, այդ թվում՝ 6 հազար ԱՄՆ քաղաքացու: Ըստ նրա՝ տարհանման գործողությունը բավականին բարդ է եղել։

Բլինքենն ընդգծել է, որ Վաշինգտոնը չի հրաժարվի Աֆղանստանի հարցով դիվանագիտությունից:

«Մենք ավարտեցինք մեր ռազմական առաքելությունը Աֆղանստանում և սկսում ենք նորը` դիվանագիտականը: Առաջին հերթին, մենք ստեղծել ենք նոր թիմ, որը պետք է իրականացնի այս դիվանագիտական առաքելությունը: Այսօրվանից ԱՄՆ-ը դադարեցրել է իր դիվանագիտական ներկայությունը Քաբուլում և գործողությունները տեղափոխել Քաթարի մայրաքաղաք Դոհա: Այս մասին մենք շուտով կտեղեկացնենք Կոնգրեսին»,- ասել է Բլինքենը:

Ըստ ԱՄՆ-ի հաշվարկների՝ Աֆղանստանում է մնացել մոտ 100-200 ամերիկացի, որոնք ցանկանում են լքել երկիրը։