Պոլսահայ հրապարակախոսը՝ թուրքերին․ Միայն մեր անունն էր մնացել, որ չէիք վերացրել

Արըս Նալջը

Շաբաթն սկսեց Քադըքյոյի Քաղկեդոն հրապարակի Սուրբ Թագավոր հայկական եկեղեցու դարպասի խաչի շուրջ պարողների տեսագրություններով:

Ներքին գործերի նախարարությունն, «անմիջապես գործի անցնելով», հարբած լինելու պատճառով կրոնական վայրն անարգելու կասկածանքով երեք հոգու ձերբակալեց, ապա ազատ արձակեց:

Յենիքյոյի եկեղեցու խաչը գիշերը պոկած ու տեսախցիկին մոտեցած հանցագործն էլ էր ազատ արձակվել:

Սոցիալական ցանցերում «Սամսունսպորտ» ակումբի անդամ մի երիտասարդի գրությունը, ով նշում էր, թե դեպքի պահին Քադըքյոյի Քաղկեդոն հրապարակում է գտնվել, Թուրքիայի՝ վերջին 20 տարվան հատուկ «միակը» լինելու եսասիրական և ազգայնամոլական մտածելակերպով հասունացած սերնդի հայելին էր:

Երբ իրեն հարց ուղղեցի, այդ երիտասարդը՝ Մահիր Ջան Թեմբիհը, ասաց․ «Ի՞նչ կլինի, զվարճանալ է՞լ չի կարելի»:

Իհարկե կարելի էր զվարճանալ, սակայն ո՞ր կրթական համակարգն էր ձեր գլուխը մտցրել կրոնական և մշակութային արժեքները անարգելով զվարճանալու կարելիությունը:

Իմացանք, թե ով է նման թույլտվություն տվել:

Թույլտվություն տվել են իրավիճակի նկատմամբ անհանգստություն ցուցաբերող, հետաքննություն սկսող և մեղավորներին ձերբակալումից հետո բաց թողնող երկրի պատկան մարմինները:

Սակայն ի՞նչ կլիներ՝ մի անգամ էլ այսպիսի հարձակումը պատժվեր ամենածանր ձևով:

Աշխարհին օրինակ ծառայել սիրող պետությունը ինչու՞ այս իրավիճակը չի օգտագործում որպես խրատ:

Քանզի իրականում անուղղակիորեն սպառնում է այլոց:

Դա անում է երիտասարդների գլուխները նման մտքեր լցնելով․ «Արե՛ք, տեսե՛ք՝ ծայրահեղ դեպքում կձերբակալենք, բաց կթողնենք»: Հայերին, հույներին, ասորիներին, հրեաներին էլ մեկ անգամ ևս ասում է․ «Ձեր հանդեպ մեր մոտեցումը սա է, ավելին մի էլ սպասեք»:

Այդ պատճառով, Սեդաթ Փեքերի պնդմամբ, իրականում հակառակը պետք է կարդալ թե պաշտոնի, թե անհատականության հավաստիությունը կորցրած նախարարություններից լսվող «ձեր կողմից ենք» հայտարարությունները:

Նախարարն ասի էլ, միևնույնն է՝ քրեական հետպնդման չեն ենթարկի

Նույն նախարարության պաշտոնյան մի հեռուստահաղորդման ժամանակ Սեդաթ Փեքերին հեղինակազրկելու համար նշել էր, թե Հրանտ Դինքի գործով պատասխանատուների հետևում կանգնած է եղել Հատուկ մարտական ստորաբաժանումը և մեղքը Փեքերի վրա էր բարդել:

Այս շաբաթ պալատական արդարադատությունը հրապարակեց որոշում, ըստ որի՝ դատական գործում այս դեպքերի հետաքննությունն անհրաժեշտ չէ: Այսինքն ասվեց, որ դատական հետապնդում իրականացնելու անհրաժեշտությունը չկա, ինչպես որ պահանջում էր Սուլեյման Սոյլուն՝ երկրի ներքին գործերի նախարարը:

Ի՞նչ է սա նշանակում:

Դո՛ւք եզրակացրեք: Անգամ եթե նախարարն էլ հայտարարի, մենք Հատուկ մարտականին չենք դիպչելու:

Ստահակներին ուղղված որոշակի ուղերձ էր դա:

Դա նշանակում է՝ «Մեր հետապնդումներից մի՛ անհանգստացեք»:

Նույնը՝ եկեղեցիների վրա հարձակվողների դեպքում: Այս երկրում անգամ մարդասպաններին չեն դիպչում:

Դիպողը կայրվի:

Դատարկ-դատարկ կխոսեն, որպեսզի հայերին և հույներին անհանգստություն պատճառեն

Մինչ այս ամենը տեղի էր ունենում, «Գալաթասարայ» ֆուտբոլային թիմի ՊՇՌ թեստերը չհամապատասխանեցին ԱՄՆ-ի չափանիշներին, թիմը հետ վերադարձավ, և գնդակը հայտնվեց Մեծ միություն կուսակցության (ՄՄԿ) նախագահ Մուստաֆա Դեսթիջիի դաշտում:

ՄՄԿ-ն պարապ չկանգնեց: Ամեն առիթով ծաղրի թեմա է գտնում հույների, հայերի, հրեաների վերաբերյալ: Փերինչեքի ու կուսակցության պես:

Ասում են, թե ՄՄԿ-ի առաջնորդն ասել է. «Կղզիների բոլոր եկեղեցիների և փոքրամասնությունների դարպասների դռներին «Հույն» բառն է գրված: Եկեք փոխադարձության սկզբունքով կարգավորենք և «հույն» գրությունը հեռացնելով՝ հունական ծագման դպրոցների կամ եկեղեցիների վրա ուղղափառ, իսկ հայկական ծագման դպրոցների ու եկեղեցիների վրա էլ «առաքելական» գրություններով ցուցանակներ կախենք»:

Հստակ է, որ նա տեղեկություն չունի ոչ պատմությունից, ոչ Լոզանից, ոչ էլ փոխադարձությունից: «Ակօս»-ի հետ հարցազրույցում Բասքըն Օրանն ամենալավ պատասխանն է տալիս:

Դեսթիջին այդ մեկնաբանությունն ակնհայտորեն դիտավորյալ է արել: ԱԶԿ-ի հետ նույն դիսկուրսը կրող այս փոքրիկ կուսակցության առաջնորդի այսչափ անգետ լինելն էլ՝ վրադիր:

Անգամ եթե եկեղեցու դռներին գրես՝ «Ուղղափառ», արդյո՞ք Դեսթիջին տեղյակ է, թե քանի տարբեր տեսակի ուղղափառներ կան: Կամ էլ, ի՞նչ է նշանակում առաքելական, բողոքական և կաթոլիկ հայ…

Բնականաբար սրանք խաղի մի մասն են միայն:

Ակնհայտ է, որ ինչ-որ մեկն ուղղորդում է Դեսթիջիին, ում հաջորդ նպատակն, ամենայն հավանականությամբ, կլինի Կղզիներում ու Ստամբուլում գտնվող հունական և հայկական դպրոցների վերացումը:

Առանց այդ էլ հետզհետե պակասող աշակերտներով և որպես «փոքրամասնություն» կոդավորված հայ համայնքի դպրոցների նկատմամբ պահանջարկը և Թուրքիայից քրիստոնյաների հավաքաբար գաղթը մեծացնելու համար նման փոքրիկ «կուսակցությունների» «անգետ» մեկնաբանությունները բավարար են արդեն իսկ սեղմված, նվազած համայնքներին ահաբեկելու համար:

Դեսթիջին էլ գիտի դրա մասին:

Գիտի, դրա համար է անում։

Մեղանչում է:

Գիտի, որ պալատական արդարադատությունն իր թիկունքին կանգնած է:

Այս շաբաթվա համար պատրաստել ենք «Կամուրջ»  հաղորդումը, որտեղ ժողովել ենք վերջին մեկ տարվա ընթացքում Թուրքիայի հայկական եկեղեցիների, վանքերի վրա կատարված հարձակումները և գանձախույզների կողոպուտները:

Այն կարող եք դիտել կիրակի, ARTI TV-ով։

Այդտեղ էլ տեսանք, որ կողոպուտի ճամփան բաց է:

Թուրքիայում ատելության խոսքը վաղուց է վերածվել ատելության արարքի:

Հայի, ասորու, հույնի, հրեայի նկատմամբ կատարված ցանկացած հանցանք անպատիժ է մնում:

Այս տարի լրատվականներում նման կողոպուտների մասին տասնյակի չափ լուրեր հայտնեցին: Բնականաբար, սրանք սոսկ գործի երևացող կողմն են:

Չերևացող կողմեր էլ կան:

Ստորև ձեզ հետ կկիսվեմ մինչև 2020 թ․ ապրիլի 4-ը միայն մամուլում հրապարակված հարձակումների ու ավերածությունների մասին լուրերով: Այս լուրերի՝ նման չափով հաճախակի դառնալը պիտի որ պատճառ ունենա…

Հետևությունները թողնում եմ ձեզ…

4-ը ապրիլի, 2020 թվական

Վան, Գյուրփընարի Սուրբ Մարիամ վանքի ոչնչացում։

9-ը մայիսի, 2020 թվական

Բաքրքյոյի եկեղեցին հարձակման է ենթարկվել։

29-ը մայիսի, 2020 թվական

Հարձակում Սկյուտարի Սուրբ Գրիգոր Լուսավորիչ եկեղեցու վրա։

Մեղավորը դատական հետապնդումից հենց այնպես ազատվել է:

29-ը մայիսի, 2020 թվական

Շըրնաքի Անդաչ գյուղի եկեղեցին վերածվել է աղբանոցի։

19-ը հունիսի, 2020 թվական

Շըրնաքում ավերվել է Օնբուդաքի քաղդեական եկեղեցին:

5-ը սեպտեմբերի, 2020 թվական

Հարձակում Յեշիլհիսարի հունական և հայկական եկեղեցիների վրա:

Տեղահան են արվել բոլոր որմնանկարները:

26-ը սեպտեմբերի, 2020 թվական

Գողացվել են Դիարբեքիրի Սուրբ Սարգիս եկեղեցու քարերը:

18-ը հոկտեմբերի, 2020 թվական

Կողոպտվել է Դերսիմի Էրգեն (Էրգան, Երկայն-Ակունքի խմբ․) գյուղի եկեղեցին ու գերեզմանատունը:

21-ը դեկտեմբերի, 2020 թվական

Երկրաշարժից վնասված Զորադիրի եկեղեցին մուտք չունի: Վերածվել է ավերակի:

27-ը հոկտեմբերի, 2020 թվական

Մարդինի ասորական եկեղեցին հանվել է վաճառքի:

1-ը նոյեմբերի, 2020 թվական

Ուրֆայում Գերմուշի եկեղեցին թալանվել է:

17-ը հունվարի, 2021 թվական

Բուրսայում վաճառքի է հանվել հայ բողոքական եկեղեցին:

3-ը հունվարի, 2021 թվական

Գանձախույզները կողոպտել են Սիլիվրիի Գերմիյան եկեղեցին:

Բալըքեսիրի 250-ամյա մատուռը վերածվել է ավերակի:

21-ը հունվարի, 2021 թվական

Կայսերիում (Կեսարիա-Ակունքի խմբ․) գանձախույզները հարձակվել են ժայռափոր եկեղեցու վրա:

23-ը հունվարի, 2021 թվական

Վանքի՝ ավտոպարկի վերածման որոշում է կայացվել:

Ասորական գերեզմանը և եկեղեցիները վերածվեցին աշխատահրապարակի:

27-ը փետրվարի, 2021 թվական

Մի նոր վաճառված եկեղեցի:

Այս անգամ Ստամբուլում:

8-ը մայիսի, 2021 թվական

Ջրերը հետ քաշվեցին, և պատմական եկեղեցի հայտնվեց: Ջրերի հետ քաշվելուն պես Քեբանի ջրամբարի տակից եկեղեցի է ի հայտ եկել:

13-ը հունիսի, 2021 թվական

Վանի Գանձակ գյուղի եկեղեցին վերածվել է ախոռի:

26-ը հունիսի, 2021 թվական

Կայսերիի Թավլու գյուղի Սուրբ Թորոս եկեղեցին ոչնչացվել է:

26-ը հունիսի, 2021 թվական

Իդիլի ասորական եկեղեցին ավերակի է վերածվել:

https://artigercek.com/yazarlar/aris-nalci/bir-adimiz-kalmisti-silmediginiz

Թարգմանեց Տիգրան Չանդոյանը

Akunq.net