ՀՀ ԱԳ նախարարին իր հավատարմագրերի պատճենը հանձնեց Արգենտինայի նորանշանակ դեսպանը

Փետրվարի 22-ին ՀՀ-ում Արգենտինյան Հանրապետության արտակարգ և լիազոր դեսպան Մարիանո Վեռգառան իր հավատարմագրերի պատճենը հանձնեց ՀՀ ԱԳ նախարար Արա Այվազյանին։

ՀՀ արտաքին քաղաքական գերատեսչության ղեկավարը շնորհավորեց դեսպան Վեռգառային պատասխանատու պաշտոնը ստանձնելու կապակցությամբ՝ համոզմունք հայտնելով, որ դեսպանն իր ուրույն ներդրումը կունենա հայ-արգենտինյան բարեկամական հարաբերությունների և միջպետական կապերի առավել զարգացման և ամրապնդման գործում:

Զրուցակիցները վերահաստատեցին փոխադարձ պատրաստակամությունը քայլեր ձեռնարկելու քաղաքական երկխոսության ակտիվացման, երկկողմ և բազմակողմ ձևաչափերում փոխշահավետ համագործակցության զարգացման և առկա ներուժի լիարժեք օգտագործման ուղղությամբ:

Որպես համագործակցության հիմնական ուղղություններ ընդգծվեցին առևտրատնտեսական, գիտակրթական, մշակութային և սպորտի ոլորտները:

Նախարար Այվազյանը և դեսպան Վեռգառան բարձր գնահատեցին արգենտինահայ համայնքի դերը Հայաստանի և Արգենտինայի միջև բարեկամության ամրապնդման և երկկողմ օրակարգի առաջմղման գործում։

Զրուցակիցները մտքեր փոխանակեցին նաև տարածաշրջանային անվտանգության և կայունության հարցերի շուրջ: