Ղարաբաղում պատերազմից հնարավոր կլիներ խուսափել, եթե կյանքի կոչվեին Մոսկվայի՝ 2016 թ. առաջարկները. ՌԴ ԱԽ

Եթե Լեռնային Ղարաբաղի վերաբերյալ Մոսկվայի՝ 2016-ի առաջարկները կյանքի կոչվեին, ապա պատերազմից հնարավոր կլիներ խուսափել: Այդ մասին հունվարի 20-ին «Ռոսիյսկայա գազետա»-ին տված հարցազրույցում ասել է Ռուսաստանի անվտանգության խորհրդի քարտուղարի տեղակալ Ռաշիդ Նուրգալիևը:

Ռուսաստանի Դաշնության Անվտանգության խորհրդի ներկայացուցչի խոսքով՝ 2016 թվականին Ռուսաստանի արտաքին գործերի նախարարությունը «հայեցակարգ էր ներկայացրել Լեռնային Ղարաբաղի շուրջ իրավիճակի փուլային կարգավորման վերաբերյալ»: 2019-ի հունիսին ԵԱՀԿ Մինսկի խմբի համանախագահները (Ռուսաստան, ԱՄՆ, Ֆրանսիա) Բաքվին և Երևանին փոխանցել էին համապատասխան փաստաթղթի վերջնական տարբերակը:

Նուրգալիևը բացատրել է, որ առաջարկվող կարգավորումը երկու փուլով էր: Առաջին փուլում ԼՂ 5 շրջանները պետք է «վերադարձվեին» Ադրբեջանին՝ «միջազգային խաղաղապահ ուժերի տեղակայումից հետո»:

Միևնույն ժամանակ, Լեռնային Ղարաբաղին տրվում էր սեփական իշխանություններ և ինքնապաշտպանական ուժեր ստեղծելու իրավունք, չեղյալ կհայտարարվեր շրջափակումը Ադրբեջանի կողմից, և պետք է վերականգնվեին առևտրատնտեսական հարաբերությունները:

«Երկրորդ փուլում նախատեսվում էր հանձնել մնացած երկու շրջանները՝ միջազգային նորմերին համապատասխան հանրաքվեի միջոցով Լեռնային Ղարաբաղի կարգավիճակի որոշմանը զուգահեռ»,– նշել է Նուրգալիևը։

Նա հավելել է, որ Բաքվի և Երևանի համաձայնությամբ պետք է պահպանվեր Լաչինի միջանցքը՝ Լեռնային Ղարաբաղի և Հայաստանի միջև տրանսպորտային հաղորդակցության համար:

«Եթե այդ առաջարկները կյանքի կոչվեին, ապա Ղարաբաղի խաղաղ բնակչության համար պայմաններ կստեղծվեին բնականոն կյանքի համար»,- ասել է Նուրգալիևը։