Իրանն ու Ադրբեջանը հստակեցրել են տնտեսական հանձնաժողովի նիստի ժամկետները

Դեկտեմբերի 24-ին Իրանի նախագահի աշխատակազմի ղեկավար Մահմուդ Վաեզին հայտարարել է, որ հունվարի սկզբին տեղի կունենա Իրանի և Ադրբեջանի համատեղ տնտեսական հանձնաժողովի նիստ: Այս մասին հայտնում է իրանական IRNA գործակալությունը:

Վաեզին նշել է, որ ավելի վաղ Իրան էր այցելել Ադրբեջանի փոխվարչապետ Շահին Մուսթաֆաևը՝ շեշտելով, որ ճանապարհորդության ընթացքում ձեռք բերված ամենակարևոր պայմանավորվածությունների թվում է Նախիջևանի Ինքնավար Հանրապետությունում նոր էլեկտրակայանի և Աստարաչայի կամրջի կառուցումը, ինչպես նաև իրանական ընկերությունների մասնակցությունը «ազատագրված շրջանների» (Արցախի՝ ադրբեջանցիների գրաված տարածքներ) վերականգնմանը:

Նա ասել է, որ Ադրբեջանի և Հայաստանի միջև հակամարտությունից հետո փոխվել են պայմանները, որոնց կապակցությամբ նոր բանակցություններ են պահանջվում մի շարք հարցերի շուրջ: Վաեզին շեշտել է, որ, համաձայն ձեռք բերված պայմանավորվածությունների, Իրանը և Ադրբեջանը պետք է համագործակցեն տրակտորների, ավտոբուսների և դեղամիջոցների արտադրության հարցում:

Անդրադառնալով այցի ընթացքում ձեռք բերված արտոնյալ առևտրային համաձայնագրերին՝ Վաեզին ասել է, որ որոշվել է երեք շաբաթվա ընթացքում Թեհրանում անցկացնել Իրանի և Ադրբեջանի համատեղ տնտեսական հանձնաժողովի նիստ: