Բարեկամ Հունաստանի ՊՆ-ն ինքնաթիռներ է տրամադրել Սփյուռքի կողմից հավաքված մարդասիրական օգնությունը Հայաստան հասցնելու համար

Հունաստանի արտաքին գործերի նախարարությունը և Հունաստանի ազգային պաշտպանության նախարարությունը կօգնեն Հունաստանում հայկական կազմակերպությունների հավաքած մարդասիրական օգնությունը ուղարկել Հայաստան. հաղորդում է «ՌԻԱ Նովոստին»՝ հղում անելով հունական ԱԳՆ-ին:

Նշվում է, որ Հունաստանի ԱԳՆ-ի Միջազգային զարգացման համագործակցության ծառայությունը (IDAS) իր առաքելության մարդասիրական մասի շրջանակներում պատասխանել է Հունաստանի հայկական կազմակերպությունների` Հայ օգնության միություն, Հայկական կապույտ խաչ և Մակեդոնիա-Թրակիա, ՀՀ դեսպանության հետ համագործակցությամբ, Լեռնային Ղարաբաղում վերջերս հայ-ադրբեջանական հակամարտությունից տուժածների համար Աթենքում հավաքված մարդասիրական օգնությունը տեղ հասցնելու` բարեգթության հայցին:

«Տրանսպորտային ինքնաթիռ տրամադրող Ազգային պաշտպանության նախարարության հետ արժեքավոր համագործակցությամբ, այս մարդասիրական օգնությունը, որը բաղկացած է տուժածների և փախստականների համար բժշկական պարագաներից և սնունդից, պետք է Հայաստան առաքվի շաբաթ օրը՝ դեկտեմբերի 12-ին»,- ասվում է հայտարարության մեջ:

Գործողությունը համակարգում է IDAS-ի գլխավոր տնօրեն Գեորգիոս Լարիսիսը, որն օգնությունը կփոխանցի Հայաստանի արտակարգ իրավիճակների նախարարության և Հայ օգնության միության մասնաճյուղի ներկայացուցիչներին՝ որպես աջակցություն և համերաշխություն ժեստ: