Մերժում` Ռուսաստանին. Ուկրաինան չի ընդունի ռուսների մարդասիրական օգնությունը

Ուկրաինայի արտգործնախարարությունը ռուսական կողմին այսօր ուղարկել է նոտա, որում նշվում է, որ Կիևը չի կարող ընդունել Ռուսաստանի մարդասիրական օգնությունը: Այս մասին հայտնում է РИА Новости-ն:

Ըստ Ուկրաինայի ԱԳՆ-ի` մերժման պատճառն այն է, որ մարդասիրական օգնության վերջնական հասցեատերը հստակ չէ:

Հիշեցնենք, որ նախօրեին Ուկրաինայի արտաքին քաղաքական գերատեսչությունը ստացել էր Ռուսաստանի ԱԳՆ-ի նոտան, որով վերջինը մտադրություն էր հայտնում մարդասիրական օգնություն ուղարկել Դոնեցկ և Լուգանսկ, նաև` փախստականներ ունեցող այլ շրջաններ:

Ռուսաստանն Ուկրաինային խնդրել էր աջակցել մարդասիրական ակցիայի իրականացմանը, այդ թվում` Ուկրաինայի տարածքում մարդասիրական օգնությամբ բեռնված ավտոմեքենաների շարասյան երթուղին որոշելու հարցում: