ԼՂ-ում ռազմական բժիշկները տեղակայել են բուժօգնության լրացուցիչ կետեր

Լեռնային Ղարաբաղում ռուս ռազմական բժիշկները տեղակայել են առաջին բուժօգնության ցուցաբերման լրացուցիչ կետեր: Այս մասին լրագրողներին հայտնել են ՌԴ պաշտպանության նախարարությունից՝ նշելով, որ բժշկասանիտարական առաջին օգնություն ցույց տալու համար ռազմական բժիշկները լրացուցիչ կետեր են տեղակայել Ստեփանակերտ, Խոջալու բնակավայրերում և Լաչինի միջանցքում ռուսական խաղաղապահ ուժերի դիտակետում։

Բացի այդ՝ այս կետերում ընդունելություն են կատարում տարբեր մասնագիտության բժիշկներ, օգնություն են ցուցաբերում նաև հոգեբանները:

«Լրացուցիչ բժշկական կետերը հագեցած են ժամանակակից բժշկական սարքավորումներով եւ տեղերում պացիենտներին հետազոտելու ու առաջնային ախտորոշում կատարելու հնարավորություն ունեն»,-  մանրամասնել են ՌԴ ՊՆ-ից:

Ըստ գերատեսչության տվյալների՝ հատուկ նշանակության բժշկական ջոկատի (ՀՆԲՋ) ռուս ռազմական բժիշկները մեկ օրում օգնություն են ցույց տվել գրեթե չորս տասնյակ պացիենտների, որոնց թվում՝ 5 երեխայի: Լեռնային Ղարաբաղում ՀՆԲՋ ստորաբաժանումների կազմում աշխատում է ավելի քան 60 մասնագետ, որոնց թվում՝ ռազմական վիրաբույժներ, անեսթեզիոլոգ-ռեանիմատոլոգներ, թերապեւտներ եւ համաճարակաբաններ: