Վարչապետը նախարարներին գաղտագողի՞ է «հանձնում» աշխատակազմերին

Օրերս պաշտոններից ազատվել են Արտաքին գործերի նախարար Զոհրաբ Մնացականյանը, Պաշտպանության նախարար Դավիթ Տոնոյանը, Աշխատանքի և սոցիալական հարցերի նախարար Զարուհի Բաթոյանը, Արտակարգ իրավիճակների նախարար Ֆելիքս Ցոլակյանը: Լուրեր էին շրջանառվում, որ հրաժարականի դիմում է  ներկայացրել նաև ԿԳՄՍ նախարար Արայիկ Հարությունյանը, սակայն լուրը նախարարությունից հերքել էին։

Վերջիններիս փոխարեն արդեն կան նոր նշանակումներ. արտգործնախարար է նշանակվել՝ Արա Այվազյանը, ՀՀ պաշտպանության նոր նախարար է նշանակվել Վաղարշակ Հարությունյանը, Անդրանիկ Փիլոյանը նշանակվել է արտակարգ իրավիճակների նախարար, Մեսրոպ Առաքելյանը՝ աշխատանքի և սոցիալական հարցերի նախարար:

Վաղը Նիկոլ Փաշինյանը ներկայացնելու է նոր նախարարներին: Yerkir.am-ի տեղեկություններով՝ Փաշինյանը, խստորեն մտահոգված լինելով և վախենալով այս օրերին տեղի ունեցող բողոքի զանգվածային ակցիաներից և հանրային ընդվզումներից, նախարարների՝ նախարարության աշխատակազմերին ներկայացման համար ընտրել է խիստ անհարմար ժամեր: Օրինակ, մեր տեղեկություններով, աշխատանքի և սոցիալական հարցերի նորանշանակ նախարար Մեսրոպ Առաքելյանին Փաշինյանը ներկայացնելու է վաղ առավոտյան, ժամը 7։30: Ի դեպ, նախարարության մի շարք աշխատակիցների (վարչության պետեր, փոխնախարարներ և այլն) ևս հրահանգված է աշխատավայրում լինել այդ ժամին՝ ներկայացնելով նաև անձնագրերը։ Այլ նախարարներ ևս, հնարավոր է, որ, ոչ թե պատվով ներկայացվեն, այլ, այսպես ասած, «գաղտագողի հանձնվեն» աշխատակազմերին: