Անցյալ օրվա ընթացքում ռուսական ավիացիան 20 թռիչք է իրականացրել խաղաղապահների Արցախ տեղափոխելու համար

Անցյալ օրվա ընթացքում ռուսական ռազմական տրանսպորտային ինքնաթիռները 20 թռիչք են իրականացրել 15-րդ խաղաղապահ բրիգադի ստորաբաժանումները տեղափոխելու համար, որոնք մասնակցելու են Լեռնային Ղարաբաղում խաղաղապահ գործողությանը՝ Հայաստան առաքելով ավելի քան 30 միավոր տարբեր տեխնիկաներ: Այս մասին հինգշաբթի օրը հաղորդել են ՌԴ ՊՆ-ից:

«Անցած օրվա ընթացքում ռազմական տրանսպորտային ինքնաթիռներն իրականացրել են 20 ավիաչվերթ: Ավելի քան 30 միավոր ավտոմեքենաներ և հատուկ տեխնիկա` զրահամեքենաներ, արտաճանապարհային բեռնատարներ, ինչպես նաև նյութատեխնիկական աջակցության սարքավորումներ և այլ ապրանքներ են առաքվել Հայաստան»,- ասվում է հաղորդագրության մեջ:

Ըստ պաշտպանության նախարարության՝ Իլ-76 և Ան-124 «Ռուսլան» ինքնաթիռները թռիչք են իրականացրել Ուլյանովսկ-Վոստոչնի օդանավակայանից դեպի Երևան քաղաքի օդանավակայաններ: