Իրանի ԱԳ փոխնախարարն անընդունելի է համարում հիվանդանոցի վրա հարձակումը

Իրանի արտաքին գործերի փոխնախարար Սեյեդ Աբաս Արաղչին, որը Երևան է ժամանել Ղարաբաղյան հակամարտության լուծման վերաբերյալ Իրանի նախաձեռնությունը ներկայացնելու նպատակով, համարում է, որ կարիք կա հնարավորինս արագ խաղաղության գործընթացի վերաբերյալ որոշում կայացնելու, որպեսզի խաղաղության համար ճանապարհ բացվի:ն Այս մասին տեղեկանում ենք Իրանի պետական ռադիոհեռուստաընկերության կայքից:

Նա նշել է, որ ցավալի է այն փաստը, որ զոհերի թիվն աճում է:

«Խաղաղ բնակչության դեմ հարձակումը միանշանակ դատապարտելի է, և խաղաղ բնակիչների, այդ թվում՝ նաև հիվանդանոցի դեմ իրականացված հարձակումն ու անմեղ մարդկանց զոհվելը միանշանակ անընդունելի են: Այդ իսկ պատճառով մենք հույս ունենք, որ խաղաղության հաստատման համար հնարավորինս արագ ճանապարհ կհարթվի: Երևանում իմ հանդիպումների առանցքում է այդ հարցը: Հույս ունենք,  որ Իրանի ներկայացրած ծրագիրը կարող է հարթել այդ ճանապարհը»,- հայտնել է Արաղչին:

Մինչ Երևան ժամանելը նա այցեր է ունեցել նաև Բաքու և Մոսկվա:

Հիվանդանոցը, որի մասին խոսում է Արաղչին, Ստեփանակերտի ծննդատունն է, որին հարվածել էր Ադրբեջանը հոկտեմբերի 28-ին՝ ավիացիայի միջոցով: Սեպտեմբերի 27-ից Արցախի դեմ Ադրբեջանի սանձազերծած պատերազմի ընթացքում ԼՂ-ում և Հայաստանում մոտ 4 տասնյակ քաղաքացիական անձ է զոհվել: