Իրանն անընդունելի է համարում Արաքս գետի վրա Թուրքիայի կողմից ամբարտակների կառուցումը

Իրանն անընդունելի է համարում Թուրքիայի կողմից Արաքս գետի վրա ամբարտակների կառուցումը։ Այս մասին Հայաստանի Հանրապետության և Իրանի Իսլամական Հանրապետության միջկառավարական համատեղ հանձնաժողովի 17-րդ նիստից հետո լրագրողների հետ ճեպազրույցում ասել է Իրանի էներգետիկայի նախարար Ալի Աքբար Մեհրաբիանը։

Նրա խոսքով՝ ամբարտակների կառուցման ուղղությամբ Թուրքիայի քայլերը համաձայնեցված չեն Արաքս գետի ավազանի երկրների հետ։

«Մենք մեր բողոքն ենք հայտնել այս կապակցությամբ և կարծում ենք, որ Արաքս գետի ավազանի բոլոր պետությունները պետք է համատեղ աշխատեն ամբարտակների կառուցման ուղղությամբ, ինչպես նաև գործեն համատեղ՝ Արաքս գետի ջուրն օգտագործելու համար, իսկ միակողմանի անհատական մոտեցումը կարող է վտանգավոր լինել Արաքս գետի համար»,- ասել է նա։

Մեհրաբիանը նշել է, որ իրանական կողմն իր մտահոգությունն է հայտնել Թուրքիային։ «Մենք բազմաթիվ հանդիպումներ ենք ունեցել Թուրքիայի համապատասխան իշխանությունների ներկայացուցիչների հետ, և նրանք մեզ վստահեցրել են, որ, անկասկած, անհրաժեշտ քայլեր կձեռնարկեն մտավախությունները վերացնելու համար։ Մենք կարծում ենք, որ Արաքս գետի ավազանի բոլոր երկրները պետք է միմյանց հետ քննարկեն այս հարցը և արդար օգտագործեն այս ջրային ռեսուրսը»,- հավելել է նա։

Հիշեցնենք, որ Իրանի ԱԳՆ ղեկավար Հոսեյն Ամիր Աբդոլլահիանը հայտարարել էր, որ Թուրքիայի միակողմանի գործողությունների անընդունելիության մասին բողոքը փոխանցվել է Թուրքիայի ԱԳՆ ղեկավար Մևլյութ Չավուշօղլուին: