Կորոնավիրուսի կարևոր ախտանիշներից մեկն արյան՝ թթվածնով հագեցվածությունն է. Արսեն Թորոսյան

ՀՀ առողջապահության նախարար Արսեն Թորոսյանը ֆեյսբուքյան էջում հետևյալ գրառումն է արել 

«Որոշել եմ պատմել կորոնավիրուսային հիվանդությանը բնորոշ սուբյեկտիվ և օբյեկտիվ ախտանիշների մասին։

Օբյեկտիվ կարևոր ախտանիշներից մեկն արյան թթվածնով հագեցվածությունն է, կամ ինչպես բժիշկներն են ասում՝ թթվածնի սատուրացիան (SpO2):

Այն նորմայում պետք է լինի 95%-ից բարձր, և դա նշանակում է, որ թոքերում թթվածնի փոխանցումն արյան մեջ տեղի է ունենում բավարար քանակով, և օրգանիզմում թթվածնաքաղց չի առաջանում:

Երբ կորոնավիրուսի պատճառով առաջանում է թոքաբորբ, և թոքերի մի հատվածը դուրս է մնում թթվածնի փոխանակման գործընթացից, սատուրացիան սկսում է անկում ապրել: Ինչքան սատուրացիան ցածր է, այնքան թոքային հյուսվածքի ախտահարման ծավալը մեծ է, և պացիենտի վիճակը ծանր է:

Հենց սատուրացիան բարձրացնելու համար են բժիշկները պացիենտներին թթվածնաթերապիա անում` սկզբում սովորական դիմակով շնչացնելով, իսկ ավելի ծանր դեպքերում թոքերի ոչ-ինվազիվ և ինվազիվ արհեստական օդափոխությանը միացնելով:

Այս ցուցանիշը մեր բոլոր պացիենտների մոտ օրական մի քանի անգամ չափվում է, որպեսզի որոշվի առողջական վիճակի փոփոխության ուղղությունը` բարելավում կամ վատթարացում, և համապատասխան միջամտություններ կատարվեն։

Հ.Գ. բարեբախտաբար, իմ մոտ թթվածնի սատուրացիան դեռ 98% է»: