Վարդենիս քաղաքում հիմնվում է նոր զբոսայգի

Վարդենիս համայնքի մարզադաշտի հարակից տարածքում մայիսի առաջին տասնօրյակի ընթացքում իրականացվել է մեծաքանակ ծառատունկ` Վարդենիս համայնքի ղեկավար Արամ Մելքոնյանի, համայնքապետարանի աշխատակիցների, վարդենիսցի կամավորների մասնակցությամբ: Այս մասին հայտնում են  Վարդենիսի համայնքապետարանից:

Ծառատնկման ծրագիրը Վարդենիս համայնքում իրականացվել է  Էյ-Թի-Փի բարեգործական հիմնադրամի կողմից՝ Վարդենիսի համայնքապետարանի հետ համագործակցությամբ: Ծառատունկ կատարվել է նաեւ Չարենցի փողոցում: Ծառատնկման ծրագիրը ավարտի կհասցվի առաջիկա օրերի ընթացքում:  

Մարզադաշտին հարող տարածքում ստեղծվող զբոսայգին ընդգրկում է շուրջ մեկուկես հեկտար տարածք: Ընդհանուր առմամբ այստեղ ծրագրվել է տնկել շուրջ 4 000 հատ հացենու տնկի: Այսօրվա դրությամբ աշխատանքներն արված են կիսով չափ: 200 հատ դեկորատիվ ծառատեսակներ էլ տնկված են քաղաքի փողոցներում: Ապագա զբոսայգում նախատեսվում է նաեւ ոռոգման համակարգի կառուցում: