Արդեն ստացել եմ իմ թեստի պատասխանը՝ բացասական է. Նազելի Բաղդասարյան

Նախօրեին մի շարք ԶԼՄ-ներ անդրադարձան ԱԺ-ում Covid-19-ի տարածման թեմային. շրջանառվում էր իմ անունը, որի համար ներկայացնում եմ այս պարզաբանումը։ Այս մասին Facebook-ի իր էջում գրել է ԱԺ «Իմ քայլը» խմբակցության պատգամավոր Նազելի Բաղդասարյանը:

Նա, մասնավորապես, նշել է. «Որեւէ մեկն ապահովագրված չէ, եւ նման տարածման դեպքում հավատացեք, որ ռիսկի խմբում մեզանից յուրաքանչյուրը կարող է հայտնվել։ Բայց անգամ այդ պարագայում եկեք հանդուրժող լինենք եւ հարգենք դիմացինի անձնական կյանքին վերաբերող տեղեկատվությունը։ Ցավոք, որոշ ԶԼՄ-ներ էթիկան խախտելով՝ երեկ նշել էին օգնականիս անձնական տվյալները եւ շեշտադրել, որ վարակակիրը ԱԺ-ում նա է եղել։

Քանի որ ավելի ուշ հրապարակավ նա հաստատել է փաստը, ինձ մնում է հորդորել բոլորին դադարեցնել այս թեմայի քննարկումը։

Մաղթում եմ առողջություն եւ արագ ապաքինում բոլոր հիվանդներին, նաեւ եւս մեկ անգամ երախտիքի խոսքեր հղում բուժաշխատողներին։ Դժվար շրջանը միասին կհաղթահարենք։

Արդեն ստացել եմ իմ թեստի պատասխանը՝ բացասական է»։

Հիշեցնենք՝ ավելի վաղ պատգամավորի օգնական Քնարիկ Հարությունյանի մոտ էր կորոնավիրուս ախտորոշվել։ Նա այդ մասին տեղեկացրել էր իր ֆեյսբուքյան էջում, մասնավորապես, նշելով. «ԱԺ նախագահ Արարատ Միրզոյանը հայտարարեց՝ աշխատակազմում հաստատված դեպք կա։ Խոսքն իմ մասին է։ Որևէ խնդիր չեմ տեսնում չբարձրաձայնելու, հատկապես, երբ որոշ լրատվականներ արդեն հասցրել են առանց ինձ հետ համաձայնեցնելու սխալ տեղեկատվություն տարածել։ Ցավոք, ինձ մոտ COVID-19 է հաստատվել, երեկ: Ես սկսել եմ ջերմել մայիսի երկուսին:

Ինչպես գրում են որոշ լրատվականներ, որ տևական ժամանակ ջերմել եմ, ճիշտ չէ: Հավատացեք, ես գիտակցում եմ իմ պատասխանատվության չափը, բացի դրանից, շատ լավ գիտեք, որ ԱԺ-ում ամեն օր կատարվում է ջերմաչափում։ Ես նույնիսկ մեծ ցանկության դեպքում չէի կարող ջերմությամբ ԱԺ շենք մտնել, թույլ չէին տա։

Ինչպես արդեն նշեցի, ջերմել եմ մայիսի 2-ին, շաբաթ օրը և այդ մասին տեղյակ եմ պահել իմ անմիջական ղեկավարին։ Որոշում ենք կայացրել, որ չեմ ներկայանա աշխատանքի, մինչև պարզենք պատճառները։ Վերջին անգամ աշխատանքի եմ եղել ապրիլի 30-ին՝ հինգշաբթի օրը։ Այդ ժամանակ չէի կարող ենթադրել, որ միգուցե արդեն վարակված եմ: 

Հաջորդը, որոշ լրատվականներ գրել են, որ ԻՆՏԵՆՍԻՎ մասնակցել եմ պետաիրավական հանձնաժողովի նիստին։ Դահլիճում եղել եմ մոտ 5-10 րոպե, տեսագրությունը կա։

Ինչպես եմ վարակվել. շփում եղել է ապրիլի 28-ին և 29-ին արդեն վիրուսը կրող մարդու հետ: Այդ պահին բնականաբար, հաստատված չի եղել COVID 19-ը վերջինիս մոտ: Երբ շաբաթ օրը սկսեցի ջերմել, ինքնամեկուսացել եմ, հետո դիմել բուժօգնության։

Ես ֆիզիկապես լավ եմ, հոգեպես՝ ճնշված։ Հիվանդությունը թեթև է անցնում, առանց էական բարդությունների։ Շնորհակալություն եմ հայտնում բոլոր բժիշկներին, դուք ֆանտաստիկ լավն եք։ Առողջ եղե՛ք»: