Առողջ եմ, առավոտյան վերադառնում եմ Արցախ. Իոաննիսյանի՝ կորոնավիրուսի թեստի պատասխանը բացասական է

Իրազեկ քաղաքացիների միավորում ՀԿ ծրագրերի համակարգող Դանիել Իոաննիսյանը ֆեյսբուքյան իր էջում գրել է․ 

«Եկավ Կորոնավիրուսի թեստիս պատասխանը: Առողջ եմ, առավոտյան վերադառնում եմ Արցախ: Արցախցիների ընտրական իրավունքը անտեր թողնող չկա: Դիտորդության մասին մանրամասն կգրեմ քիչ անց»:

Նշենք, որ մարտի 31-ին Արցախում նախագահական և խորհրդարանական ընտրություններին մասնակցելու համար Հայաստանից մեկնող դիտորդները պետք է կորոնավիրուսի թեստ հանձնեն։

Երեկ կառավարության նիստի ժամանակ Նիկոլ Փաշինյանը հայտարարել էր․ «Պետք է համագործակցենք դիտորդական կազմակերպությունների հետ, հասկանանք դիտորդները, այսպես ասած, ռիսկային գոտիներից են, թե ոչ: Եթե ռիսկային գոտիներից են, խնդրենք փոխարինել նրանց այլ դիտորդներով, ինչպես նաև մեկնումից առաջ նրանք պետք է արագ թեստերով թեստավորվեն»։