ՏԵՍԱՆՅՈՒԹ․ Ի՞նչ իրավունք ունի վարչապետի պաշտոնը զբաղեցնող ինչ-որ մեկը ծաղիկներ խոնարհելու, իսկ քաղաքացիները՝ ոչ․ Ա․ Խանդոյանը՝ Ծիծեռնակաբերդի ոստիկաններին

Ինչո՞ւ պետք է վարչապետը կարողանա այցելել Ծիծեռնակաբերդ, մենք՝ ոչ․ ըստ Yerkir.am-ի ոստիկաններին այսպիսի հարց է ուղղել  Արայիկ Խանդոյանի եղբայր՝ Արարատ Խանդոյանը, երբ նրան ու ընկերներին թույլ չեն տվել բարձրանալ Ծիծեռնակաբերդի հուշահամալիր։

«Երկրի վարչապետի պաշտոնը զբաղեցնող ինչ-որ մեկը Ծիծեռնակաբերդի անմար կրակի մոտ ծաղիկներ է խոնարհում: Ես բացատրություն եմ պահանջում, թե ի՞նչ իրավունք ունի ինքը ծաղիկներ խոնարհելու, իսկ քաղաքացիները ոչ: Ոստիկանները փորձում են ինձ ահաբեկել վարչական իրավախախտումների ակտով, բայց դա ինձ չի հուզում»,-հայտարարեց նա:

Նա տարակուսեց՝ եթե ՀՀ բոլոր քաղաքացիներն հավասար են, ուրեմն ինքն էլ իրեն իրավունք է վերապահում մասնակցելու Ծիծեռնակաբերդի հուշահամալիրում ծաղիկներ խոնարհելու միջոցառմանը:

Ոստիկանները պարզաբանեցին, որ Խանդոյանը խախտել է արտակարգ դրության իրավական ռեժիմը, հետևաբար, վարչական արձանագրություն է կազմվում:

«Այն, որ թերթիկում նշված է, որ գնում է հարգանքի տուրք մատուցելու, չի տեղավորվում պարետի ու պարետատան կողմից ներկայացված բացառություններում»,-ասաց ոստիկանը։

Արձանագրության ակտը կազմվեց, որը Արարատ Խանդոյանը չստորագրեց եւ հրաժարվեց վերցնել:

Հիշեցնենք, որ մինչև ապրիլի 25-ի ժամը 23:59-ը ներառյալ ՀՀ պարետի որոշմամբ՝ ոստիկանությունը փակել է Ծիծեռնակաբերդի մուտքը անվտանգության և կազմակերպչական նկատառումներով։

Մանրամասն՝ տեսանյութում․