ՏԵՍԱՆՅՈՒԹ․ Նորաշեն համայնքը ամբողջությամբ մեկուսացրել են․ վարչապետը պատմեց, թե ինչու

Անցնող օրվա դրությամբ ունենք կորոնավիրուսի 48 նոր հաստատված դեպք, 61 առողջացում․ կարող ենք ասել, որ դրական բալանսով ենք փակել օրը՝ ըստ Yerkir.am-ի ասաց ՀՀ առողջապահության նախարար Արսեն Թորոսյանը կառավարության նիստի մեկնարկին։

Դեպքերի ընդհանուր թիվը 1 159 է։

1 500 հոգուց ավելի դուրս է եկել կարանտինից, իսկ կարանտինում գտնվող անձանցից 300 հոգու մոտ հաստատվել է դրական արդյունք․ սա, ըստ Թորոսյանի, նշանակում է, որ կարանտինային միջոցառումները էֆեկտիվ են։

Հիվանդանոցային մահճակալանի ֆոնդը կիսով չափ է ծանրաբեռնված․ «Եթե այս տեմպը կարողանանք պահել, կարող ենք հույս ունենալ, որ իրավիճակը կառավարելի կլինի»,-ասաց նախարարը։

Նա նաև տեղեկացրեց, որ այսօր 16 տեստից 1 դրական դեպք ենք ունենում, որը լավ ցուցանիշ է։

Վարչապետ Նիկոլ Փաշինյանը վստահեցրեց, որ համաճարակի կորը գտնվում է կառավարելիության տիրույթում։

Այնուամենայիվ, դժգոհեց մարդկանց վերաբերմունքից և մտավախություն հայտնեց, որ եթե այսպես շարունակենք, կարող է ունենանք համաճարակի նոր բռնկում։

Խոսքը Արարատի մարզի Նորաշեն գյուղում մեկուսացած քաղաքացիներից մեկի հետ կապված պատմության մասին էր․ երբ նրա ընտանիքում դժբախտությւոն է տեղի ունեցել, դիմումի հիման վրա ուղեկցել են թաղման արարողության, բայց տեղում չի պահել պայմանները և հարազատների հետ գրկախառնվել։ 2 օր անց տեստը նրա մոտ դրական է եղել և պարետատունը որոշում է կայացրել Նորաշեն համայնքը ամբողջությամբ մեկուսացնել։

Փաշինյանը նկատեց, որ առաջիկայում ապրիլի 24-ն է և եթե էմոցիոնալ գտնվենք, կարող ենք աղետ բերել մեր գլխին։

«Եթե այդ օրը մեր էմոցիոնալ պահվածքի պատճառով հարյուրավոր մարդիկ մահանան, չեմ կարծում՝ մեր զոհերի հոգիներն ավելի հանգիստ կլինեն»,-ասաց Փաշինյանը։

Մյուս կողմից էլ չենք կարող տնտեսությունը ուղղակի փակել, այդ պատճառով ձեռնարկությունները կաշխատեն՝ մնալով պետական հսկողության տակ։

Արսեն Թորոսյանը նկատեց, որ հենց գործատուի շահից է բխում ջերմող աշխատակցին տուն ուղարկել, քանի որ հակառակ դեպքում հնարավոր է վարակվեն նաև մյուսները։

Վարչապետը վստահեցրեց, որ սննդամթերքի շուկայում ունենք հուսալի վիճակ, գները տատանումներից հետո վերադառնում են նախկին տեմպին, ապրանքային դեֆիցիտ չունենք և չենք ունենալու։

Վրացի գործընկերների հետ համագործակցությամբ, Փաշինյանի խոսքով, հաջողվել է լուծել Հայաստանից բնականոն արտահանումների խնդիրը, իսկ ներկրումները խնդիր չեն ունեցել։

Մանրամասն՝ տեսանյութում․