Ասկերանի Աստղաշեն գյուղում շահագործման կհանձնվի նորակառույց մանկապարտեզը. համայնքի ղեկավար

ԱՀ կառավարության ֆինանսավորմամբ՝ Ասկերանի շրջանի Աստղաշեն գյուղում կառուցվել է «Աստղիկ» մանկապարտեզը, որի պաշտոնական բացումը տեղի կունենա մոտ օրերս:

Այս մասին «Արցախպրես»-ի թղթակցի հետ զրույցում ասել է Աստղաշենի համայնքի ղեկավար Արթուր Գրիգորյանը:

Նրա խոսքով՝ մինչ այսօր գյուղում մանկապարտեզ չկար, ինչն էլ լուրջ խնդիր էր:

Մեկհարկանի մանկապարտեզի շենքի շինարարական աշխատանքները սկսվել էին 2018 թվականին. այն նախատեսված է շուրջ 30 երեխայի համար, որը բավարարում է գյուղի պահանջները:

«Մանկապարտեզը կառուցված է ժամանակակից չափանիշներին համապատասխան. այն ամբողջովին կահավորված է, հարմարավետ է և գեղեցիկ: Համոզված եմ, որ այս հաստատությունն իր կարևոր դերակատարությունը կունենա մատաղ սերնդի դաստիարակության և կրթության գործում, ինչպես նաև կթեթևացնի ծնողների հոգսը»,-մանրամասնել է համայնքի ղեկավարը: