Չավուշօղլուն հայտարարել է ռուս-թուրքական բանակցությունների վերսկսման մասին

Թուրքիայի Արտաքին գործերի նախարար Մևլյութ Չավուշօղլուն հայտարարել է, որ այսօր Անկարայում կվերսկսվեն ռուսական կողմի հետ բանակցությունները՝ Իդլիբի շուրջ վերջին շրջանում ստեղծված լարված իրավիճակը հարթելու ուղղությամբ. ըստ Yerkir.am-ի՝ նշում է «ՌԻԱ Նովոստին»:

Ռուսական պատվիրակությունը Անկարա էր ժամանել օրեր առաջ և հանդիպում էր տեղի ունեցել ռուսական և թուրքական պատվիրակությունների միջև, սակայն դրանից հետո արված կցկտուր հայտարարություններից պարզ էր դարձել, որ կողմերը համաձայնության չեն եկել:

Չավուշօղլուն հայտարարել է նաև, որ դեռևս ոչ մի համաձայնություն ձեռք չի բերվել ռուսական կողմի հետ, իսկ Իդլիբում հրադադարի ռեժիմը պետք է վերականգնվի:

Բանակցություններում թուրքական պատվիրակության կազմում ընգրկված են ԱԳՆ փոխնախարար Սեդաթ Օնալը, ԱԳՆ, Գլխավոր շտաբի և Ազգային հետախուզական ծառայության այլ ներկայացուցիչներ, իսկ ռուսական պատվիրակության կազմում են՝ երկրի ՊՆ, հետախուզական ծառայության ներկայացուցիչները՝ փոխարտգործնախարար Սերգեյ Վերշինինի և Սիրիայի հարցով ՌԴ նախագահի հատուկ ներկայացուցիչ Ալեքսանդր Լավրենտյևը: