Իսրայելա-պաղեստինյան բանակցությունների վերսկսման համար նպաստավոր պայմաններ են ստեղծվել

Իսրայելի վարչապետ Բենիամին Նեթանյահուն հայտարարել է նախկին արտգործնախարար եւ երկար տարիների իր մրցակից Ցիպի Լիվնիի հետ կոալիցիոն համաձայնագիր ստորագրելու մասին. հայտնում է «Ռիա Նովոստին»:

Լիվնիի հիմնական դերակատարությունը պաղեստինցիների հետ ընդհատված բանակցությունների վերսկսմանը նպաստելն է: Նա լինելու է Նեթանյահուի «Լիկուդ» կուսակցության ղեկավարած կառավարության բանակցությունների խոսնակը: Համարվում է, որ իսրայելական քաղաքական այս ուժերի միջեւ կնքված համաձայնությունը իսրայելա-պաղեստինյան բանակցությունների վերսկսման համար ԱՄՆ նախագահ Բարաք Օբամայի՝ երկու ամիս անց տարածաշրջան կատարելիք այցից առաջ նպաստավոր նախապայման է:

Պաշտոնական բանակցություններն ընդհատվել էին 2010 թվականից: Բենիամին Նեթանյահուն հաղթանակ էր տարել հունվարին անցկացված խորհրդարանական ընտրություններում, բայց՝ ոչ մեծամասնական ձայներով: