2020 թ. ևս երթուղայիններում ստորացումը կշարունակվի. քաղաքապետը խաբել է նաև տրանսպորտի հարցում

Հասարակական տրանսպորտի բարելավման ու նոր ցանցի ներդրման համար 2020 թ. Երևանի բյուջեում տող չկա հատկացված, բնականաբար, գումար էլ չկա՝ հաղորդում է  Yerkir.am-ը:

Քաղաքապետի առաջին տեղակալ Հրաչյա Սարգսյանն ավագանու նիստի ժամանակ տեղեկացրել է, որ տրանսպորտային ցանցի փոփոխությունների, նոր ավտոբուսների ներմուծման վերաբերյալ քննարկումներ են եղել դոնորների ու կառավարության հետ:

Ավագանու ԲՀԿ անդամ Հռիփսիմե Առաքելյանը հակադարձել է փոխքաղաքապետին. «Արդեն 8 ամիս նույն բանն եք ասում՝ կառավարության հետ քննարկում ենք. ոչ մի նոր բան չունե՞ք հաղորդելու: Երևանի տրանսպորտի խնդիրը սարսափելի է: Աղբահանությունից հետո այն երկրորդ կարևոր հարցն է, իսկ դուք ասում եք՝ Երևանի 2020 թվականի բյուջեում այն  ընդգրկված չէ: Ասեք, մենք էլ իմանանք՝ քանի ավտոբուս եք բերելու, անընդհատ նույն թիվն եք ասում, թե 120-150 միլիոն դոլար է արժանալու ծրագիրը: Գումարներ ճարե՞լ եք, կառավարությունը հստակ ստորագրված փաստաթուղթ ունի՞՝ թե ով և ինչքան գումար է հատկացրել Երևանում տրասպորտային բարելավման ու նոր ցանցի ներդրման համար»:

Փոխքաղաքապետը Հռիփսիմե Առաքելյանին նույն պատասխանները տվեց, իսկ Հայկ Մարությանն ասաց՝ 5 անգամ պատասխանեց, ի՞նչ է, ֆի՞լմ եք ուզում, որ ցույց տանք, տիկին Առաքելյան:

Հիշեցնենք՝ տրանսպորտի խնդիրը շուտափույթ կարգավորելը և ժողովրդին «հների գազելներից ազատագրելը» հանդիսացավ Երևանի քաղաքապետի նախընտրական խոստումների ամենառանցքային կետը:

Փաստորեն՝ այս հարցում ևս քաղաքապետը չկատարեց իր խոստումը՝ իր ճոխ գործուղումների և պարգևավճարների պայմաններում երևանցիներին թողնելով նույն կոտրած տաշտակի առջև՝ թշվառ և ողորմելի վիճակում: