Տրանսպորտի նոր նախարարը եւս դեմ է աջ ղեկով մեքենաների ներմուծմանը

Կառավարության նիստից հետո լրագրողները տրանսպորտի և կապի նախարար Աշոտ Հակոբյանից հետաքրքրվեցին աջ ղեկով մեքենաների ներմուծման մասին` ասելով, որ վարորդները բողոքի ակցիաներ են պատրաստվում իրականացնել` աջ ղեկով մեքենաների ներմուծման թույլտվության պահանջով:

Նախարարը նշեց, որ բողոքները ակտիվացել են հոկտեմբերի 1-ին ընդառաջ, սակայն ժամկետի հետ կապված սահմանափակումներ չեն եղել: Մասնավորապես` հետագայում աջ ղեկով մեքենաների սահմանափակման արգելքի ժամկետը հանվել է, անժամկետ է դարձել: Սակայն, նախարարի խոսքով, 2020թ. հունվարի 1-ից ԵՏՄ անդամ երկրներում արգելվելու են աջ ղեկով մեքենաների ներմուծումները, և մեկ տարվա միջակայքի համար իմաստ չունի ներմուծել աջ ղեկով մեքենա:

Ինքը նախարարը, ևս դեմ է աջ ղեկով մեքենաների ներմուծմանը, և եթե աջ ղեկով մեքենաների թիվը զգալիորեն մեծանում է, դա վտանգավոր է երթևեկության համար: Նա կարծում է, որ նախկին կառավարությունը ճիշտ որոշում է կայացրել` արգելել աջ ղեկով մեքենաների ներմուծումը: