Ինչպես է անցել «խաղաղության նախապատրաստվող» ադրբեջանցի լրագրողների այցը Հայաստան և Արցախ

Նոյեմբերի 17-21-ը, ԵԱՀԿ նախագահի անձնական ներկայացուցչի գրասենյակի միջնորդությամբ, տեղի են ունեցել հայ և ադրբեջանցի լրագրողների փոխադարձ այցեր: Հայ լրագրողներ Դավիթ Ալավերդյանը, Արտյոմ Երկանյանը և Արցախից՝ Էդգար Էլբակյանն այցելել են Բաքու, իսկ ադրբեջանցի լրագրողները այցելել են և՛ Հայաստան, և՛ Արցախ: Ադրբեջանցի լրագրողներն էին՝ 1news.az-ի թղթակից Էլշան Ռուստամովը, Trend գործակալության գլխավոր խմբագիր Էլչին Վելիևը և ադրբեջանական «Вестник Кавказа» կայքի թղթակից Օրհան Էլչուևը:

Եթե հայ լրագրողները շրջում էին Ադրբեջանով և լուսանկարվում ժամանակին հայաշատ Բաքվում՝ որպես զբոսաշրջիկներ, ապա ապշերոնյան լրագրողները՝ Հայաստան և Արցախ այցի ընթացքում առիթը բաց չէին թողել հոխորտալու Երևանի պարսկական Կապույտ մզկիթի, Շուշիի մզկիթների՝ ադրբեջանական կոթող լինելու վերաբերյալ:

Մասնավորապես՝ Էլշան Ռուստամովը Շուշիից և Քարվաճառից լուսանկարներ էր հրապարակել՝ «մեր հայրենի հողը» մակագրությամբ:

Արտյոմ Երկանյանը նշել էր, որ ադրբեջանցիներն առիթը բաց չէին թողել քարոզչության համար՝ ներկայացնելով իբր «հայերի կողմից մշակութային ցեղասպանություն» իրականացնելու անհիմն պնդումները:

Արդյո՞ք Հայաստանում կամ Արցախում ադրբեջանցի լրագրողներին ցուցադրվել և ներկայացվել են ադրբեջանցիների կողմից Ջուղայի խաչքարերի ոչնչացման, Բաքվի և Սումգայիթի ջարդերի, Մարաղայի կոտորածների և այլնի մասին փաստեր, դժվար է ասել: Սակայն ստեղծվում է տպավորություն, որ այս փոխադարձ այցելություններն ավելի շատ օգուտ տվեց Ադրբեջանին՝ «խաղաղասեր» ձևանալու և հերթական հակահայկական քարոզչությունն անելու համար:

Ի դեպ, հավելենք նաև, որ հայ լրագրողների այցի ընթացքում բողոքի ակցիա էր տեղի ունեցել, որի ժամանակ զառամյալ ծերունիներ վառել էին հայկական դրոշի գույներով ինչ-որ թուղթ, վանկարկել հակահայկական, ինչպես նաև հակառուսական, հակաիրանական կարգախոսներ: