«Հայաստանի սիրային քնարերգություն» տարեգրքի շնորհանդես «Հովհ. Թումանյանի տուն» կենտրոնում

2019 թվականի նոյեմբերի 9-ին Վիրահայոց թեմի «Հովհաննես Թումանյանի տուն» գիտամշակութային կենտրոնում կայացավ հանդիպում Գյումրի քաղաքից ժամանած բանաստեղծ, թարգմանիչ, դրամատուրգ Արա Գևորգյանի հետ, նաև` նրա «Հայաստանի սիրային քնարերգություն» տարեգրքի շնորհանդեսը. Yerkir.am-ը տեղեկանում է Հայ Առաքելական Ուղղափառ Սուրբ Եկեղեցու Վիրահայոց թեմի պաշտոնական կայքից: 

Հովհաննես Թումանյանի նախկին բնակարանը վերստին լեփ-լեցուն էր հանդիսատեսով:

Հետաքրքրությունը մեծ էր, քանզի օտարալեզու գրականության երկրպագուները և գնահատողները եկել էին լսելու հայ դասական գրականության նմուշները՝ ռուսերեն թարգմանությամբ: Ուշագրավ է, որ բանաստեղծ, թարգմանչի նախաձեռնությամբ և նրա շուրջը համախմբված թարգմանիչների վարպետ թարգմանությամբ ռուսալեզու ընթերցասեր հասարակայնությունը ծանոթանում է հայ դասական հեղինակների գործերին, Հայաստանի սիրային քնարեգության ժողովածուներին, որոնցից չորրորդ տարեգրքի շնորհանդեսը տեղի ունեցավ Ամենայն հայոց բանաստեղծի նախկին բնակարանում: Հնչեցին թարգմանություններ հայ գրականության գանձարանից՝ միջնադարից մինչև նոր և ժամանակակից գրականություն:

Բանաստեղծ, թարգմանիչ Մարինա Կիրակոսյան-Մոսեսովան ներկայացրեց իր կողմից կատարված տարբեր բանաստեղծների ստեղծագործությունների թարգմանությունը:

Երեկոն դարձավ հայ գրականության նմուշների ռուսերեն թարգմանության հետ առնչության գեղեցիկ հնարավորություն: