Ռուսաստանի ԱԳՆ-ն անդրադարձել է Փաշինյանի հայտարարությանը

Ռուսաստանի ԱԳՆ պաշտոնական ներկայացուցիչ Մարիա Զախարովան ճեպազրույցի ընթացքում ադրբեջանցի լրագրողի խնդրանքով մեկնաբանել է ՀՀ վարչապետ Նիկոլ Փաշինյանի՝ օգոստոսի 5-ին Արցախի Հանրապետության մայրաքաղաք Ստեփանակերտում հնչեցրած հայտարարությանը, ըստ որի՝ Արցախը Հայաստան է:

«Իհարկե, կա ներքին հռետորաբանություն, կան ներքին կարգեր, որոնք արտացոլում են քաղաքական շարժումների, կուսակցությունների տեսակետները՝ հաշվի առնելով նաև այն, որ մենք խոսում են ժողովրդավար պետության մասին: Եվ կա խաղաղ գործընթաց, որն ունի մասնակիցներ,  համահովանավորներ, կան միջազգային ջանքեր, որոնք ուղղված են խաղաղ կարգավորմանը: Եվ, անկասկած, մենք ելնում ենք այն բանից, որ կողմերի հայտարարությունները պետք է բխեն խաղաղ կարգավորմանն ուղղված ջանքերի համանտեքստից: Միշտ դժվար է նմանատիպ հայտարարություններից հետո վերադառնալ բանակցային գործընթացի նախկին դիրքերին: Մենք նմանատիպ հայտարարություններ լսել ենք նաև տարբեր մակարդակներով՝ երկու կողմից էլ: Երկու կողմն էլ իրենց քայլերը պետք է կատարեն խաղաղ կարգավորման տեսանկյունից»,- նշել է Զախարովան: