Ռուսաստանի ԱԳՆ-ն անդրադարձել է հայ-ադրբեջանական սահմանային լարվածությանը

Ռուսաստանի ԱԳՆ-ն մտահոգված է հայ-ադրբեջանական սահմանային լարվածության կապակցությամբ: Այս մասին այսօր հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան:

Պատասխանելով «Մոսկվա-Բաքու» լրատվական ծառայության լրագրողի` հայ-ադրբեջանական սահմանային լարվածության վերաբերյալ հարցին՝  նա նշել է. «Մենք անհանգստացած ենք հայ-ադրբեջանական սահմանային լարվածության կապակությամբ, որի արդյունքում զոհվել է հայ զինծառայող, և  երկու կողմից էլ կան վիրավորներ: Հայտնում ենք մեր ցավակցությունը զոհվածի ընտանիքին և հարազատներին ու ցանկանում ենք բոլորին ապաքինում:

Լարվածության աճը հակասում է վերջերս ձեռք բերված՝ հրադադարի մասին համաձայնություններին և քաղաքական մեթոդներով հակամարտության կարգավորմանը հասնելու հայտարարություններին: Հետագա լարվածության աճը անընդունելի է, և կոչ ենք անում հակամարտող կողմերին՝ ցուցաբերել զսպվածություն, հրաժարվել ուժի կիրառումից և միջոցներ ձեռնարկել իրավիճակի կայունացման ուղղությամբ»: