ԵՄ-ի ԱԳ նախարարները հուլիսի 15-ի պլանային հանդիպման ընթացքում կքննարկեն Իրանի միջուկային գործունեությունը

Արտաքին գործերի նախարարությունների ղեկավարների մակարդակով Եվրամիության խորհրդի՝ հուլիսի 15-ին Բրյուսելում կայանալիք պլանային նիստում կքննարկվի Իրանի միջուկային գործունեությունը` ներառյալ նրա կողմից ուրանի՝ 3,67 տոկոսից բարձր մակարդակի հարստացումը: Այդ մասին հաղորդել է Եվրամիության արտաքին քաղաքական ծառայության պաշտոնական ներկայացուցիչ Մայա Կոսյանչիչը հուլիսի 8-ին Եվրահանձնաժողովում կայացած ճեպազրույցում. տեղեկացնում Է ՏԱՍՍ-ը:

Նա նաեւ նշել է, որ ԵՄ-ն «մշտական շփման մեջ է ԳՀՀՊ-ի (Իրանի միջուկային ծրագրի շուրջը Գործողությունների համատեղ համապարփակ պլան) մասնակիցների հետ այդ գործարքի շրջանակներում հետագա քայլերի վերաբերյալ, ներառյալ ԳՀՀՊ-ի Համատեղ հանձնաժողովի նիստի անցկացումը նախարարների մակարդակով, բայց այդ հանդիպման օրն առայժմ նշանակված չէ»: