Ռուսաստանն է հետաքրքրված երկրում ներքին դիմակայությամբ. Զուրաբիշվիլի

Վրաստանի նախագահ Սալոմե Զուրաբիշվիլին հայտարարել է, որ Ռուսաստանն է հետաքրքրված  երկրում ներքին դիմակայությամբ: Նման կերպ նա մեկնաբանել է Թբիլիսիում երեկ սկսված բողոքի ցույցերը:

«Դա շատ մեծ հանցագործութուն էր, որը տեղի ունեցավ այսօր, փաստ, որը խաթարում է երկրի արժանապատվությունը»,-գրել է նա իր ֆեյսբուքյան էջում:

«Կոչ եմ անում հասարակությանը` հանգստություն ցուցաբերել»,-հավելել է Զուրաբիշվիլին:

Երեկ Վրաստանի խորհրդարանում անցկացվող`Ուղղափառության միջխորհրդարանական վեհաժողովի ժամանակ սկանդալ է տեղի ունեցել: Վրացի  ընդդիմադիր պատգամավորներին դուր չի եկել, որ Ռուսաստանի Պետդումայի պատգամավոր Սերգեյ Գավրիլովը, որը նախագահում էր նիստը, նստել է Վրաստանի խորհրդարանի խոսնակի տեղում: Ավելի ուշ ակտիվիստները հավաքվել են խորհրդարանի շենքի մոտ և այրել ՌԴ նախագահ Վլադիմիր Պուտինի նկարը: Այնուհետև իրավիճակն ավելի է լարվել:

Գիշերը Թբիլիսիի խորհրդարանի մոտ հարյուրավոր ցուցարարներին ցրելու համար Վրաստանի ՆԳՆ-ն կիրառել է ջրցաններ, ռետինե փամփուշտներ, զրահամեքենա, հրշեջ մեքենա և լուսաձայնային նռնակներ: Նրանք պահանջում էին ՆԳՆ ղեկավարի և խորհրդարանի նախագահի հրաժարականը: