Նրանք և՛ նախկին, և՛ ներկա պաշտոնյաներ կարող են լինել. Քոչարյանը` հանձնաժողով հրավիրվողների մասին

Խորհրդարանում ապրիլյան պատերազմի հանգամանքները պարզելու հարցով քննիչ հանձնաժողովի անդրանիկ փակ նիստից հետո ԱԺ պաշտպանության, անվտանգության հարցերի մշտական հանձնաժողովի նախագահ Անդրանիկ Քոչարյանը, որ նաև նորաստեղծ հանձնաժողովի նախագահն է, պատասխանեց լրագրողների հարցերին:

Ասաց, թե արդեն իսկ նախնական պատկերացում կա` ովքեր կարող են հրավիրվել հանձնաժողով, որ տեղեկատվություն տան: «Նրանք և՛ նախկին, և՛ ներկայիս պաշտոնյաներ կարող են լինել: Մենք կանչելու ենք բոլոր նրանց, ովքեր կարող են հանձնաժողովի աշխատանքին տալ օգտակար տեղեկություններ: Իրավական առումով` գուցե շատերը կարող են օգտվել իրենց իրավունքից և ասել՝ չենք գալիս: Բայց բարոյական տեսանկյունից որևէ մեկն իրավունք չունի շրջանցելու առկա հարցերն ու  տեղեկատվությունը չփոխանցելու հանձնաժողովին: Այդպես լինել չի կարող»,- նշեց Քոչարյանը` համոզմունք հայտնելով` բոլորն էլ արդյունավետ կհամագործակցեն հանձնաժողովի հետ:

«Բարոյականից բացի, կա՞ այլ լծակ, որ նախկին պաշտոնյաները գան ու տեղեկություններ հաղորդեն»,- հարցրեցին լրագրողները:

Հանձնաժողովի նախագահը պատասխանեց` նաև լրագրողներն են իր լծակները: «Իհարկե, կարող են հրաժարվել, դա իրենց իրավունքն է: Հանձնաժողովն այդ դեպքում կգնահատի հրաժարվելու պատճառները, այսինքն` նրանք չե՞ն ուզում, որ մենք մոտենանք ինչ-որ տեղեկությունների, եթե դրանք կան: 100-ից ավելի զոհ ենք ունեցել, այդտեղ մեղավորներ չկա՞ն»,- հարցին հարցով պատասխանեց պատգամավորը` ավելացնելով. «Հանդիպելու ենք նաև ապրիլյան պատերազմի բոլոր զոհերի հարազատների հետ: Նրանք գալու են հանձնաժողով, որովհետեւ մի հսկա տեղեկատվության կրող նաև նրանք են: Բաներ կան` նրանց միջոցով էլ պետք է հասկանանք: Զոհերի հարազատներն ու նրանց ծառայակից ընկերները մեր ուսումնասիրությունների հիմնական շրջանակում են լինելու»: