Բուլղարիայում թուրք դեսպանին կանչել են երկրի ԱԳՆ

Սոֆիայում Թուրքիայի դեսպան Հասան Ուլուսոյը, մասնակցելով Բուլղարիայի Քըրջալը քաղաքում գործարանի բացմանը, հայտարարել է, որ բուլղարական դպրոցներում պետք է ավելի շատացնել թուրքերենի ուսուցումը. հաղորդում է Sputnik-ի թուրքական ծառայությունը:

Բուլղարիայի վարչապետ Բոյկո Բորիսովն իր ֆեյսբուքյան էջում հայտարարել է, որ օտար լեզուների ուսուցումը դիվանագետի պատասխանատվությունների շրջանակում չէ, և յուրաքանչյուր քաղաքացի իրավունք ունի իր ուզած լեզվով կրթություն ստանալու: «Բացի այդ` երկրորդ լեզվով կրթության վերաբերյալ խորհուրդներ տալը թուրք դեսպանի գործը չէ: Պահանջում եմ բացատրություն տալ այդ արտահայտությունների համար»,- նշել է նա:

Բուլղարիայի ընդդիմության առաջնորդ Կորնելիա Նինովան էլ հայտարարել է, որ դա միջամտություն է երկրի ներքին գործերին:

Դեսպան Ուլուսոյը նաև կանչվել է երկրի ԱԳՆ, ինչից հետո հայտարարել է, որ դա ասել է այն բանի համար, որ թուրքերեն իմացողները ավելի լավ կարող են աշխատել թուրքական գործարաններում: