Եգիպտոսում կալանավորված ավստրալացու ընտանիքը Ավստրալիայի կառավարությանը կոչ է արել օգնել նրան

Եգիպտոսում մեկ տարի կալանավորված ավստրալացու ընտանիքը Ավստրալիայի կառավարությանը կոչ է արել օգնել նրան: Այս մասին հայտնում է  Associated Press-ը։

Ավստրալական Բրիսբըն քաղաքի բնակիչ Հազեմ Համուդան Կահիրեում ձերբակալվել է 2018 թվականի հունվարին` ընտանիքի հետ այնտեղ հանգստանալու ժամանակ: Եգիպտոսի ոստիկանությունը Համուդային մեղադրել է երկրում արգելված «Մուսուլման եղբայրներ» իսլամական խմբավորման հետ կապերի, ինչպես նաև սոցիալական ցանցերում ապատեղեկատվություն տարածելու մեջ: Մեղադրյալի ընտանիքը հերքում է բոլոր մեղադրանքները։

2019 թվականի փետրվարին Համուդային ազատ են արձակել բանտից, բայց եգիպտական իշխանությունները չեն թողել, որ նա ինքնաթիռ նստի և մեկնի Ավստրալիա` չնայած այն հանգամանքին, որ ավստրալացուն ուղեկցել են երկրի հյուպատոսության աշխատակիցները։

Համուդայի 30-ամյա դուստրը դիմել է Ավստրալիայի իշխանություններին՝ խնդրագրով, որպեսզի օգնեն հորը` դուրս գալ Եգիպտոսից։ Նա նաև նշել է, որ վախենում է, որ հայրը կրկին կհայտնվի ճաղերի հետևում։