ՀԴՄ-ների շուկայի ազատականացումն իր դրական էֆեկտը կբերի. Ավինյան

Կառավարության այսօրվա նիստում պետական եկամուտների նախագահ  Դավիթ Անանյանը ներկայացրեց ՀԴՄ-ների ներկրման, իրացման և դրանց տեխնիկական սպասարկման ազատականացման վերաբերյալ որոշման նախագծերը:

Ըստ դրանցից մեկի՝ ՊՈԱԿ-ի գործունեությունը սահմանափակվելու է անվճար հսկիչ դրամարկղային մեքենաների` սահմանամերձ բնակավայրերին տրամադրմամբ և անվճար տեխնիկական սպասարկման ապահովմամբ:

Մեկ այլ նախագծով նախատեսվում է հանել ՊՈԱԿ-ի կողմից ՀԴՄ-ների գնման, իրացման գործընթացին առնչվող կարգավորումները:

Գործադիրն առաջարկում է վերանայել և ուժ կորցրած ճանաչել ՀԴՄ սարքերի մի շարք տեխնիկական պահանջներ, որոնք նոր սերնդի ՀԴՄ-ների դեպքում արդիական չեն:

«Ըստ էության, մենք ազատականացնում ենք հսկիչ դրամարկղային մեքենաների ներկրումը, վաճառքը և տեխնիկական սպասարկումը, ՀԴՄ սարքերի տեխնիկական պահանջները կրճատում և արդիականացնում ենք ու ամբողջությամբ ազատականացնում ենք ոլորտը»,- ասաց Անանյանը:

Փոխվարչապետ Տիգրան Ավինյանն էլ ասաց, որ սա նաև այն ցավոտ հարցերից է, որի վերաբերյալ ժամանակ առ ժամանակ բողոքներ են ստացել: «Կարծում եմ` պետական մենաշնորհից հրաժարվելը և ՀԴՄ-ների շուկայի ազատականացումն իր դրական էֆեկտը կբերի»,- նշեց նա: