Նոր Զելանդիայի Հայ դատի հանձնախումբը դատապարտում է կատարված ահաբեկչությունը

ՀՅԴ Նոր Զելանդիայի Հայ Դատի հանձնախումբը միանշանակ դատապարտում է Քրայսթչերչի մզկիթների վրա տեղի ունեցած հարձակումները, որոնց հետևանքով 49 մարդ է մահացել: 

Մենք դատապարտում ենք նաև զինված մեղադրյալի կողմից հայերենին, ինչպես նաև այլ քրիստոնյա ազգությունների՝ վրացիների, սերբերի, ռուսների և ավստրիացիների լեզուներին անդրադառնալու փորձը՝ այդ լեզուներով նշումներ անելով իր զենքի վրա, որով հարձակում է իրականացրել իսլամական համայնքի վրա:

Նման խաչակրաց արշավանքները տեղ չունեն մեր աշխարհում, և հաստատապես տեղ չունեն խաղաղասեր Նոր Զելանդիայում:  
 
Նոր Զելանդիայում և ողջ աշխարհում բնակվող հայերն անվերապահորեն կանգնած են հարձակման ենթարկված մզկիթների հետևորդների և անդամների կողքին: Մենք սգում ենք այն ընտանիքների հետ, որոնք կորցրել են իրենց սիրելիներին, ինչպես նաև Նոր Զելանդիայի ողջ մահմեդական համայնքի հետ:  

ՀՅԴ Նոր Զելանդիայի Հայ Դատի հանձնախումբն իր խորին ցավակցությունն է հայտնում և աղոթում է այս դժվարին պահին: